काठमाडौँ । राष्ट्रिय स्वतन्त्र पार्टी (रास्वपा) ले आगामी वैशाख १५ गतेदेखि देशभर एकसाथ जिल्ला अधिवेशन सुरु गर्ने निर्णय गरेको छ। आइतबार वनस्थलीस्थित पार्टी केन्द्रीय कार्यालयमा बसेको सचिवालय बैठकले साङ्गठनिक सुदृढीकरण र महाधिवेशनको तयारीलाई तीव्रता दिँदै जिल्ला अधिवेशनको मिति तय गरेको हो। बैठकले साङ्गठनिक संरचनालाई जगदेखि नै मजबुत बनाउने लक्ष्य राखेको छ।
पार्टी प्रवक्ता मनिष झाका अनुसार सचिवालय बैठकले जिल्ला अधिवेशनका लागि आवश्यक कार्यविधि र प्रक्रियाका बारेमा समेत विस्तृत छलफल गरेको छ। रास्वपाले यसपटक प्रविधिको प्रयोग गर्दै पारदर्शी र लोकतान्त्रिक ढङ्गले नेतृत्व चयन गर्ने रणनीति लिएको छ। जिल्ला अधिवेशनको यो अभियानले पार्टीको आगामी महाधिवेशनका लागि समेत मार्गप्रशस्त गर्ने अपेक्षा गरिएको छ।
यसैबिच, सचिवालयले तय गरेका यी महत्त्वपूर्ण निर्णयहरू र कार्यसूचीलाई अनुमोदन गर्न रास्वपाको केन्द्रीय समिति बैठक भोलि सोमबार बस्ने भएको छ। भोलिको बैठकले जिल्ला अधिवेशनको कार्यतालिका, महाधिवेशन कार्यविधि मस्यौदा समिति गठन र नेताहरूको कार्यविभाजन लगायतका एजेन्डाहरूलाई अन्तिम रूप दिनेछ। पछिल्लो समय रास्वपाले आफ्नो साङ्गठनिक संरचनालाई टोल र वडा तहसम्म पुर्याउने अभियानलाई थप सशक्त बनाउँदै लगेको छ।
