काठमाडौँ । हाल नेपालमा पश्चिमी वायु र स्थानीय वायुको मिश्रित प्रभाव रहँदा मुलुकका विभिन्न क्षेत्रको मौसममा फेरबदल आएको छ। मौसम पूर्वानुमान महाशाखाका अनुसार यसै प्रणालीका कारण अहिले गण्डकी, बागमती र कोशी प्रदेशका थोरै स्थानहरूमा हल्का वर्षा भइरहेको छ। आज दिउँसो कोशी प्रदेश लगायत बागमती, गण्डकी र कर्णाली प्रदेशका हिमाली तथा पहाडी भूभागमा साधारणतया बदली रहने देखिएको छ।
दिउँसो कोशी प्रदेशका पहाडी तथा हिमाली भेगका केही स्थानहरू र बागमती, गण्डकी तथा कर्णालीका थोरै स्थानहरूमा चट्याङ्गसहित हल्कादेखि मध्यम वर्षा र हिमपातको सम्भावना रहेको छ। यस्तै मधेस, लुम्बिनी र सुदूरपश्चिम प्रदेशका पहाडी भूभागका साथै कोशीको तराई क्षेत्रका एक–दुई स्थानमा पनि पानी पर्ने महाशाखाले जनाएको छ। आज मधेस र कोशी प्रदेशका तराई क्षेत्रमा हावाहुरी चल्ने सम्भावना छ भने सुदूरपश्चिम र लुम्बिनी प्रदेशका भूभागमा भने तापक्रम बढ्ने अनुमान गरिएको छ।
आज राति कोशी, बागमती र गण्डकी प्रदेशका हिमाली तथा पहाडी भूभागमा साधारणतया बादल लाग्नेछ भने कर्णालीको हिमाली क्षेत्र र मधेस प्रदेशमा आंशिक बदली हुनेछ। रातिको समयमा कोशीका थोरै स्थान तथा बागमती र गण्डकीका एक–दुई स्थानमा चट्याङ्गसहित हल्का वर्षा र हिमपातको सम्भावना कायमै रहनेछ। तराईका थोरै स्थानहरूमा राति पनि हावाहुरी चल्न सक्ने भएकाले आवश्यक सतर्कता अपनाउन महाशाखाले अनुरोध गरेको छ।
