काठमाडाैं । इजरायलले गाजा पट्टीको झण्डै ७० प्रतिशत भूभागलाई आफ्नो पूर्ण नियन्त्रणमा लिने रणनीति बनाएको छ। अन्तर्राष्ट्रिय समाचार संस्था रोयटर्सका अनुसार इजरायली सैन्य कमाण्डले गाजामा जारी सैन्य अभियानको नयाँ खाका तयार पार्दै सेनालाई सोही अनुसार अघि बढ्न निर्देशन दिएको हो।
इजरायली सरकार र सैन्य अधिकारीहरूबीच भएको उच्चस्तरीय बैठकले गाजाको ठूलो हिस्सा (करिब ७० प्रतिशत भूभाग) लाई सैन्य घेराबन्दीमा पार्दै आफ्नो नियन्त्रण सुदृढ गर्ने लक्ष्य राखेको छ। यसका लागि सेनालाई बाँकी रहेका क्षेत्रहरूमा थप आक्रामक बन्न र कारबाही तीव्र पार्न विशेष निर्देशन दिइएको रोयटर्सले जनाएको छ।
नयाँ सैन्य रणनीति अनुसार इजरायली सेनाले गाजाको उत्तरी र मध्य क्षेत्रका मुख्य भागहरूलाई आफ्नो पकडमा राख्दै दक्षिणी क्षेत्र र सीमावर्ती इलाकातर्फ सैन्य दबाब बढाउने योजना बनाएको छ। सेनालाई दिइएको निर्देशनमा हमासको गढ मानिएका बाँकी सुरुङ मार्ग र कमाण्ड सेन्टरहरूलाई लक्षित गरी कारबाही अघि बढाउन भनिएको छ।
यसैबीच, इजरायलले गाजाको ठूलो भूभाग कब्जा गर्ने गरी सैन्य परिचालन बढाउने निर्देशन दिएसँगै अन्तर्राष्ट्रिय समुदायले मानवीय संकट अझ चुलिने चिन्ता व्यक्त गरेका छन्। संयुक्त राष्ट्रसंघ र सहायता एजेन्सीहरूका अनुसार यो रणनीतिले गाजाभित्रका लाखौं सर्वसाधारण थप जोखिममा पर्ने र सहायता सामग्री वितरणमा झन् ठूलो अवरोध आउने देखिन्छ।
