काठमाडौँ । भौतिक पूर्वाधार तथा यातायात मन्त्री लम्सालले अबको तीन वर्षभित्र नेपालका कुनै पनि सडकहरूमा खाल्डाखुल्डी नदेखिने दाबी गरेका छन्। बिहीबार सङ्घीय संसद्मा सडक सुरक्षा र पूर्वाधार विकासका विषयमा बोल्दै मन्त्री लम्सालले यस्तो प्रतिबद्धता जनाएका हुन्।
मन्त्रालयगत बजेट र भावी योजनाबारे संसद्मा जानकारी गराउँदै मन्त्री लम्सालले सडक सुधार र खाल्डाखुल्डी व्यवस्थापनका लागि आगामी ३ वर्षमा २८ अर्ब ५० करोड रुपैयाँ खर्च गरिने स्पष्ट पारे। उनले विगतका सरकारहरूको तुलनामा वर्तमान सरकारले सडक सुरक्षा र गुणस्तरलाई उच्च प्राथमिकतामा राखेर धेरै काम गरिरहेको समेत दाबी गरे।
सांसदहरूले उठाएका प्रश्नहरूको जवाफ दिने क्रममा उनले राष्ट्रिय गौरवका र ठुला आयोजनाहरूको निर्माण कार्य बजेट अभावका कारण नरोकिने सुनिश्चितता समेत गराएका छन्। ठुला आयोजनाहरूलाई निरन्तरता दिन सरकारसँग पर्याप्त स्रोत र योजना रहेको उल्लेख गर्दै मन्त्री लम्सालले विकास निर्माणका कार्यमा निर्धक्क भएर लाग्न सरोकारवालाहरूलाई आग्रह गरे। बजेट छलफलका क्रममा सडकको दुरावस्थालाई लिएर आलोचना भइरहेका बेला भौतिक पूर्वाधार मन्त्रीको यो रणनीतिक योजना र दाबीलाई महत्त्वका साथ हेरिएको छ।
