काठमाडौँ । अमेरिकाको फिलाडेल्फियामा सम्पन्न फिफा विश्वकप २०२६ को ‘राउन्ड अफ १६’ अन्तर्गतको रोमान्चक भिडन्तमा पाराग्वेलाई १–० गोलअन्तरले पराजित गर्दै साबिक उपविजेता फ्रान्सले क्वाटरफाइनलमा आफ्नो स्थान पक्का गरेको छ।
आइतबार बिहान भएको प्रतिस्पर्धात्मक खेलको पहिलो हाफ निकै रक्षात्मक बनेको थियो, जसका कारण दुवै टोलीले गोलरहित बराबरी खेलेका थिए। तर, खेलको दोस्रो हाफमा फ्रान्सले पाएको अवसरलाई सदुपयोग गर्दै अग्रता लियो। खेलको ६८औँ मिनेटमा डिफेन्सिभ एरियामा भएको फललाई लिएर भिडियो असिस्टेन्ट रेफ्री (भिएआर) को रिभ्युपछि फ्रान्सले पेनाल्टी पाएको थियो। उक्त अवसरलाई ७०औँ मिनेटमा स्टार स्ट्राइकर केलियन एम्बाप्पेले कुनै गल्ती नगरी सहजै जाली चुमाउँदै टोलीको जित सुनिश्चित गरे।
यस सानदार गोलसँगै एम्बाप्पेले विश्वकप इतिहासमा आफ्नो व्यक्तिगत गोल सङ्ख्या १९ पुर्याएका छन्। अब उनी अर्जेन्टिनाका लियोनेल मेस्सीको नाममा रहेको २० गोलको कीर्तिमान बराबरी गर्नबाट मात्र एक गोलले पछाडि छन्। साथै, जारी विश्वकपमा ७ गोल र २ असिस्टसहित उनी मेस्सीलाई उछिन्दै ‘गोल्डेन बुट’ को दौडमा शीर्ष स्थानमा उक्लिएका छन्।
अब सेमिफाइनल प्रवेशका लागि फ्रान्सले आगामी शुक्रबार राति १:४५ बजे मोरक्कोको सामना गर्नेछ। मोरक्कोले अर्को प्रि-क्वाटरफाइनल खेलमा सह-आयोजक क्यानडालाई ३-० ले पराजित गर्दै अन्तिम ८ मा स्थान सुरक्षित गरिसकेको छ।
