काठमाडौँ । विशेष अदालतले बहुचर्चित ‘टेरामक्स’ खरिद प्रकरणमा मुछिएका पूर्वसञ्चार तथा सूचना प्रविधि मन्त्री मोहनबहादुर बस्नेतलाई सफाइ दिएको छ। नेपाल दूरसञ्चार प्राधिकरणको उपकरण खरिदमा भएको भनिएको भ्रष्टाचार मुद्दामा पूर्वमन्त्री बस्नेतविरुद्ध लगाइएको आरोप पुष्टि हुन नसकेको भन्दै अदालतले उनलाई निर्दोष ठहर गरेको हो।
विशेष अदालतका न्यायाधीशहरू हेमन्त रावल, डिल्लीरत्न श्रेष्ठ र उमेश कोइरालाको संयुक्त इजलासले सोमबार उक्त फैसला सुनाएको हो। फैसलाअनुसार पूर्वमन्त्री बस्नेतका साथै प्राधिकरणका पूर्वअध्यक्ष पुरुषोत्तम खनाल, अच्युतानन्द मिश्र, सुरेन्द्रलाल हाडा, रेवतीराम पन्थ लगायत १९ जना प्रतिवादीले यस मुद्दामा सफाइ पाएका छन्। यसैगरी, यस प्रकरणमा मुछिएको परामर्शदाता कम्पनी ‘भ्यानराइज सोलुसन्स’लाई पनि अदालतले सफाइ दिएको छ।
अर्कोतर्फ, सोही खरिद प्रकरणमा दूरसञ्चार प्राधिकरणका पूर्वअध्यक्ष दिगम्बर झासहित अन्य तीन जनालाई भने अदालतले भ्रष्टाचारमा संलग्न रहेको भन्दै दोषी ठहर गरेको छ। लामो समयदेखि चर्चा र विवादमा रहेको यस मुद्दाको फैसलासँगै पूर्वमन्त्री बस्नेत लगायतका अधिकांश आरोपितहरूले कानुनी रूपमा उन्मुक्ति पाएका छन्।
