काठमाडौँ । फिफा विश्वकप २०२६ अन्तर्गतको रोमाञ्चक क्वाटरफाइनल भिडन्तमा आइतबार बिहान उपाधि दाबेदार मानिएको इंग्ल्याण्ड र यस प्रतियोगिताको ‘डार्क हर्स’ साबित भएको नर्वे आमनेसामने हुँदैछन्। अमेरिकाको मियामी गार्डन्सस्थित मियामी स्टेडियममा नेपाली समयअनुसार बिहान २:४५ बजे सुरु हुने यस खेलले सेमिफाइनल पुग्ने टोलीको टुङ्गो लगाउनेछ।
विश्वकपको नकआउट चरणमा उत्कृष्ट प्रदर्शन गर्दै आएको नर्वे २८ वर्षपछि पहिलो पटक क्वाटरफाइनलमा प्रवेश गर्दै ऐतिहासिक सफलताको सँघारमा छ। प्रतियोगितामा सनसनी मच्चाइरहेका नर्वेली स्ट्राइकर अर्लिङ हालान्ड ७ गोलसहित उच्च लयमा रहेका छन्। विश्वविजेता ब्राजिललाई समेत स्तब्ध पारेर उच्च मनोबलमा रहेको नर्वेली टोली इंग्ल्याण्डको रक्षापङ्क्तिमा देखिएको कमजोरीको फाइदा उठाउँदै सेमिफाइनल यात्रा तय गर्ने रणनीतिका साथ मैदानमा उत्रिनेछ।
यता, उपाधिको बलियो दाबेदार इंग्ल्याण्डका लागि भने कप्तान ह्यारी केन र जुड बेलिङ्घमको जोडी प्रमुख हतियार बनेको छ। आयोजक मेक्सिकोलाई सङ्घर्षपूर्ण खेलमा पराजित गर्दै क्वाटरफाइनल पुगेको इंग्ल्याण्डलाई आफ्नो रक्षापङ्क्तिको प्रदर्शनले भने केही चिन्तित बनाएको छ। यसका साथै, रातो कार्डका कारण डिफेन्डर जारेल क्वान्साह र चोटका कारण जोर्डन हेन्डरसनले यस महत्त्वपूर्ण खेल गुमाउने निश्चित भएको हुँदा इंग्ल्याण्डमाथि थप दबाब सिर्जना भएको छ।
यसअघिका १२ अन्तर्राष्ट्रिय भेटमा इंग्ल्याण्डले ७ र नर्वेले २ खेलमा जित हात पारेका छन् भने ३ खेल बराबरीमा सकिएका छन्। यस रोमाञ्चक खेलको विजेताले सेमिफाइनलमा अर्जेन्टिना वा स्विट्जरल्यान्डमध्ये एकसँग प्रतिस्पर्धा गर्नुपर्नेछ।
