काठमाडौँ । जल तथा मौसम पूर्वानुमान महाशाखाका अनुसार सोमबार देशभर मनसुनी वायुको तीव्र प्रभावका कारण अधिकांश भू-भागमा बदली रही वर्षाको सम्भावना रहेको छ। विशेषगरी तीनवटा प्रदेशमा अति भारी वर्षाको समेत आकलन गरिएकाले मौसम विज्ञान विभागले उच्च सतर्कता अपनाउन सर्वसाधारणमा अनुरोध गरेको छ।
आज दिउँसो कोशी, मधेश, बागमती, गण्डकी र लुम्बिनी प्रदेशमा अधिकांश बादल लाग्नेछ भने कर्णाली र सुदूरपश्चिम प्रदेशमा साधारणतया बदली रहनेछ। कोशी, बागमती र गण्डकी प्रदेशका पहाडी तथा तराईका धेरै स्थानहरूमा मध्यम वर्षाको सम्भावना छ। साथै मधेश, लुम्बिनी, सुदूरपश्चिम र कर्णाली प्रदेशका पहाडी तथा तराईका केही स्थानहरूमा मेघगर्जन र चट्याङ्गसहित मध्यम वर्षा र हिमपात हुनेछ। दिउँसो कोशी, बागमती र गण्डकी प्रदेशको पहाडी भू-भागका थोरै स्थान तथा मधेशसहित यी तीन प्रदेशका तराई क्षेत्रका एक-दुई स्थानमा भारीदेखि धेरै भारी वर्षाको सम्भावना रहेको छ।
रातिको समयमा पनि कोशी, मधेश, बागमती, गण्डकी र लुम्बिनी प्रदेशमा अधिकांश बादल लाग्नेछ। कोशी, बागमती र गण्डकीको हिमाली क्षेत्रका धेरै र बाँकी हिमाली भेगका केही स्थानमा मध्यम वर्षा तथा हिमपातको पूर्वानुमान छ। राति मधेश प्रदेशका साथै कोशी, बागमती र गण्डकीका धेरै स्थान तथा लुम्बिनी, कर्णाली र सुदूरपश्चिमका केही क्षेत्रमा मध्यम वर्षा हुनेछ। राति कोशी र बागमती प्रदेशका पहाडी तथा तराई भू-भाग र मधेश प्रदेशका थोरै स्थानमा भारीदेखि धेरै भारी वर्षाको सम्भावना छ भने गण्डकी र लुम्बिनीका एक-दुई स्थानमा भारी वर्षा हुनेछ। विशेषगरी कोशी, बागमती र गण्डकी प्रदेशको पहाडी भू-भागका एक-दुई स्थानमा अति भारी वर्षाको समेत सम्भावना रहेकाले नदी तटीय क्षेत्र र भिरालो जमिन आसपासका बासिन्दालाई सजग रहन आग्रह गरिएको छ।
