काठमाडौँ । नेपाल स्टक एक्सचेन्ज (नेप्से) परिसूचकमा बिहीबार पनि हरियाली छाएको छ। दिनभर तीव्र उतारचढावका बीच कारोबारको अन्त्यमा नेप्से परिसूचक ३१.५४ अंक अर्थात् १.१८ प्रतिशतले बढेर २,६९५.६० विन्दुमा पुगेर बन्द भएको छ।
परिसूचकमा आएको उत्साहजनक वृद्धिसँगै बजारमा कारोबार रकमले पनि नयाँ गति समातेको छ। बिहीबार ३५० वटा कम्पनीका २ करोड ३२ लाख ५८ हजार कित्ता सेयर ६९ हजार ६१९ पटकको कारोबारमार्फत कुल ८ अर्ब ५७ करोड ९ लाख रुपैयाँभन्दा बढीमा किनबेच भएका छन्। अघिल्लो दिनको तुलनामा कारोबार रकममा १ अर्ब रुपैयाँभन्दा बढीको बढोत्तरी देखिएको हो।
आजको बजारलाई विशेषगरी बैंकिङ उपसमूहले सशक्त नेतृत्व प्रदान गरेको छ। वाणिज्य बैंकहरूको समूहगत परिसूचक सर्वाधिक २.२८ प्रतिशतले उकालो लागेको छ। त्यस्तै होटल तथा पर्यटन र अन्य उपसमूहमा समान २.०५ प्रतिशत, वित्त (फाइनान्स) समूहमा १.६९ प्रतिशत र विकास बैंक समूहमा १.५५ प्रतिशतको वृद्धि दर्ज भएको छ।
कारोबार भएकामध्ये १८१ कम्पनीको सेयर मूल्य बढेको छ भने ९१ कम्पनीको मूल्य घटेको छ र ६ वटा कम्पनीको मूल्य स्थिर रहेको छ। आज बेनी हाइड्रोपावरका लगानीकर्ताले सर्वाधिक १५ प्रतिशत नाफा कमाएका छन् भने स्वाभिमान लघुवित्तको मूल्य ८.७२ प्रतिशत र नेपाल पुनर्बीमा कम्पनीको मूल्य ५.६१ प्रतिशतले बढेको छ।
कारोबार रकमका आधारमा घलेम्दी हाइड्रो ३५ करोड ६१ लाख रुपैयाँसहित शीर्ष स्थानमा रह्यो। यस्तै सिद्धार्थ बैंक २५ करोड ३८ लाख, लक्ष्मी सनराइज बैंक २४ करोड २७ लाख तथा कुमारी बैंक २३ करोड ५९ लाख रुपैयाँसहित सर्वाधिक कारोबार गर्ने कम्पनीहरूको सूचीमा अग्रस्थानमा रहेका छन्।
