काठमाडौं। नेपाल राष्ट्र बैंकले बैंकिङ प्रणालीमा थुप्रिएको तरलता व्यवस्थापन गर्न एक वर्ष अवधिको ऋणपत्र निष्कासन गरेको छ।
मंगलबार राष्ट्र बैंकले २५ अर्ब रुपैयाँको ऋणपत्र जारी गर्दै बैंकहरुलाई अनलाइनमार्फत बोलकबोल पेस गर्न आह्वान गरेको हाे।
ऋणपत्रमा लगानीका लागि बैंकहरुले अपराह्न २ बजेसम्म बोलपत्र पेस गर्नुपर्नेछ। बैंकले ऋणपत्रमा गरेको लगानीको ब्याजदर ६/६ महिनामा पाउनेछन्। ब्याजदर बोलकबोलबाट तय हुनेछ।
राष्ट्र बैंकले एक साताको अन्तरालमा चौथोपटक ऋणपत्र निष्कासन गरेको छ। यसअघि राष्ट्र बैंकले १ वर्षे अवधिका लागि २५ /२५ अर्ब रुपैयाँ खिच्न ऋणपत्र ‘क’, ‘ख’ र ‘ग’ जारी गरेको थियो।
