काठमाडौँ । साताको दोस्रो कारोबार दिन धितोपत्र बजारमा निराशाजनक माहोल देखिएको छ। निरन्तर उतारचढावका बिच मंगलबार नेपाल स्टक एक्सचेन्ज (नेप्से) परिसूचक दोहोरो अंकले ओरालो लागेको हो। बजार मापक सूचक २४.६३ अंकले घटेर २६०८.३३ को विन्दुमा खुम्चिन पुगेको छ।
यस दिन बजारमा कारोबार रकम पनि औसत नै रहेको छ। कुल ३६५ वटा कम्पनीका ८७ लाख ३७ हजारभन्दा बढी कित्ता सेयर खरिदबिक्री हुँदा ३ अर्ब २५ करोड ८७ लाख रुपैयाँ बराबरको आर्थिक कारोबार भएको छ। बजारमा बिक्री चाप उच्च हुँदा २३५ वटा कम्पनीको सेयर मूल्यमा गिरावट आएको छ भने जम्मा ३५ वटा कम्पनीका लगानीकर्ताले मात्र नाफा कमाएका छन्। बाँकी ५ कम्पनीको मूल्यमा कुनै परिवर्तन भएन।
समूहगत उपसूचकहरूतर्फ हेर्दा आज बजारका सबै समूहहरू राताम्मे भएका छन्। विशेषगरी व्यापार (ट्रेडिङ) समूहमा सबैभन्दा धेरै १.७४ प्रतिशतको गिरावट दर्ता भएको छ। समग्र बजार ओरालो लाग्दा पनि स्नो रिभर्स लिमिटेडको सेयर मूल्यमा भने करिब १५ प्रतिशतको उछाल आएको छ भने कर्पोरेट डेभलपमेन्ट बैंक र स्वाभिमान लघुवित्तका लगानीकर्ताले पनि राम्रो नाफा कमाएका छन्। यता, टक्सार पिखुवाखोला हाइड्रोपावरको सेयर मूल्य भने सर्वाधिक १४ प्रतिशतभन्दा बढीले घटेको छ। मंगलबार सर्वाधिक कारोबार गर्ने कम्पनीको सूचीमा १३ करोडभन्दा बढीको टर्नओभरसहित सिद्धार्थ बैंक अग्रस्थानमा रहेको छ।
