काठमाडौँ । कर प्रशासनलाई चुस्त र सहज बनाउँदै स्वैच्छिक कर सहभागिता अभिवृद्धि गर्न राजस्व सम्बन्धी निकायहरूलाई विशेष निर्देशन दिइएको छ। आन्तरिक राजस्व विभागमा आयोजना गरिएको विभागीय अधिकृतहरूको बैठकलाई सम्बोधन गर्दै करदातालाई त्रसित वा जबरजस्ती गरेर नभई खुसी पारेर कर सङ्कलन गर्नुपर्नेमा जोड दिइएको छ।
बजारमा कर प्रशासनप्रति सकारात्मक सन्देश प्रवाह हुनुपर्ने र नागरिकले कर तिर्नलाई बोझको रूपमा लिन नहुने वातावरण निर्माण गर्न कर प्रशासकहरूलाई आग्रह गरिएको छ। कर सङ्कलनको दायरा बढाउन प्रविधि र सहजीकरणलाई मुख्य आधार बनाउनुपर्ने भन्दै कार्यसम्पादनका क्रममा आवश्यक पर्ने जनशक्ति, पूर्वाधार वा सूचना प्रविधिको अभाव भए निसङ्कोच माग गर्न र उत्कृष्ट नतिजा दिने कर्मचारीहरूलाई प्रोत्साहित गरिने स्पष्ट पारिएको छ।
यसै गरी, बजेटले लिएको १६ खर्बको राजस्व लक्ष्य पूरा गर्न आन्तरिक राजस्वको योगदान महत्त्वपूर्ण हुने भएकाले छुट सुविधा (स्कीम) हरूको प्रभावकारी कार्यान्वयन, करदाता सचेतना अभिवृद्धि र डिजिटल कारोबार प्रवर्धनमा जोड दिइएको छ। साथै, मुलुकलाई वित्तीय जोखिमको ‘ग्रे लिस्ट’ बाट बाहिर ल्याउन सम्पत्ति शुद्धीकरणसम्बन्धी अपराधहरूमाथि कर प्रशासनका तर्फबाट सूक्ष्म निगरानी बढाउन र कर्मचारी सरुवामा अनुचित दबाब नलगाई कार्यसम्पादनका आधारमा वृत्ति विकास गर्ने प्रतिबद्धता जनाइएको छ।
