काठमाडौँ । अविरल वर्षापछिको बाढी–पहिरोले सडक सञ्जाल अवरुद्ध भएसँगै बजारमा खाद्यान्न तथा खाना पकाउने ग्यासको कृत्रिम अभाव र मूल्यवृद्धि हुन नदिन वाणिज्य, आपूर्ति तथा उपभोक्ता संरक्षण विभागले बजार अनुगमनलाई तीव्र बनाउने भएको छ।
विभागले मङ्गलबारदेखि काठमाडौँ उपत्यकाका १३ वटा विभिन्न क्षेत्र निर्धारण गरी १० वटा विशेष टोलीसहित करिब ४० जना निरीक्षक कर्मचारी परिचालन गर्ने तयारी गरेको छ। विभागका सूचना अधिकारी अनिल किराँतीका अनुसार बजारमा मौज्दात रहेका पुराना खाद्यान्न तथा एलपी ग्यास पुरानै मूल्यमा बिक्री गरिनुपर्नेछ।
सडक अवरुद्ध भएको मौका छोपी कृत्रिम अभाव सिर्जना गर्ने वा बढी मूल्य लिई कालोबजारी गर्ने व्यापारीमाथि अनुगमनका क्रममा कैफियत भेटिए तत्कालै कडा कारबाही गरिने विभागले चेतावनी दिएको छ।
