काठमाडौँ । नेपालीहरूको महान् चाड बडा दसैँ आजदेखि घरघरमा विधिपूर्वक घटस्थापना गरी जमरा राखेसँगै औपचारिक रूपमा सुरु भएको छ । आश्विन शुक्ल प्रतिपदाका दिन बिहानै पवित्र नदी वा स्थलबाट ल्याइएको बालुवा तथा पञ्चमाटोमा जौ, मकै र गहुँ छरेर कलश स्थापना गरी जमरा राख्ने गरिन्छ ।
आजैदेखि नौ दिनसम्म देवी दुर्गाका विभिन्न नौ स्वरूपहरूको आराधना गरिने नवरात्र आरम्भ भएको छ । नेपाल पञ्चाङ्ग निर्णायक विकास समितिले तोकेको शुभ साइतमा पूजा कोठा तथा दसैँघरमा विधिपूर्वक कलश स्थापना गरी गणेश, वरुण र नवग्रहको पूजाअर्चना गरिएको छ । नौ दिनसम्म हुर्काइएको पहेँलो जमरालाई विजयादशमीका दिन देवीको प्रसादका रूपमा मान्यजनको हातबाट टीकासँगै ग्रहण गर्ने परम्परा छ ।
घटस्थापना सुरु भएसँगै देशभर चाडपर्वको रौनक छाएको छ । शक्तिपीठ तथा मन्दिरहरूमा दर्शनार्थीको चहलपहल बढेको छ भने बजारमा पूजा सामग्री र खाद्यान्न किनमेल गर्नेहरूको भीड देखिएको छ ।
