काठमाडौँ । देशमा अहिले पश्चिमी वायु र स्थानीय वायुको आंशिक प्रभाव कायम रहेको छ, जसका कारण आगामी दिनहरूमा मौसमी प्रणालीमा फेरबदल आउने देखिएको छ। विशेषगरी पहाडी तथा हिमाली भू-भागमा आंशिकदेखि साधारणतया बदली रहने प्रक्षेपण गरिएको छ भने केही क्षेत्रमा मेघगर्जन र चट्याङ्गसहित वर्षाको सम्भावना रहेको छ।
यसैक्रममा, गण्डकी, लुम्बिनी, कर्णाली र सुदूरपश्चिम प्रदेशका हिमाली तथा पहाडी भू-भागका केही स्थानहरूमा साथै कोशी र बागमती प्रदेशका एक-दुई स्थानमा मेघगर्जन र चट्याङ्गसहित मध्यम वर्षा र हिमपात हुन सक्नेछ। लुम्बिनी र सुदूरपश्चिम प्रदेशका तराई भू-भागका केही क्षेत्रमा समेत मध्यम वर्षाको सम्भावना देखिएको छ भने रात्रिको समयमा अधिकांश भू-भागमा मौसम सामान्यतया सफा रहनेछ।
देशका उच्च पहाडी तथा हिमाली क्षेत्रका थोरै स्थानहरूमा हल्का हिमपात र पहाडी भू-भागमा वर्षाको सम्भावना रहेकोले चिसो बढ्न सक्ने तर्फ सचेत गराइएको छ। तराईका केही क्षेत्रमा हल्का वर्षाको सम्भावना रहेकाले खेतीपाती र दैनिक जनजीवनमा पर्न सक्ने असरलाई मध्यनजर गर्दै आवश्यक सतर्कता अपनाउन सर्वसाधारण तथा सम्बन्धित सबै निकायलाई अनुरोध गरिएको छ।
