काठमाडाैं । यही पुस २७ र २८ गते काठमाडाैंमा नेपाली कांग्रेसकाे विशेष महाधिवेशन हुने घाेषणा भएकाे छ ।
बुधबार नयाँबानेश्वरमा पत्रकार सम्मेलन गर्दै विशेष महाधिवेशन माग गर्दै प्रस्ताव दर्ता गरेका ५४ प्रतिशतभन्दा बढी महाधिवेशन प्रतिनिधिहरूले उक्त घोषणा गरेका हुन्।
‘पार्टी विधानको मर्म र भावनालाई पूर्ण सम्मान गर्दै यही २०८२ पुस २७ र २८ गते काठमाडौंमा हुन गइरहेको विशेष केन्द्रीय महाधिवेशनमा सम्पूर्ण केन्द्रीय महाधिवेशन प्रतिनिधिहरूको उत्साहपूर्ण सक्रिय उपस्थिति र सहभागिताका लागि हार्दिक आग्रह गर्दछौं। यसका लागि आवश्यक व्यवस्थापकीय तयारी तीव्र गतिमा भइरहेको जानकारी गराउन चाहन्छौं,’ कार्यक्रममा जारी प्रेस विज्ञप्तिमा भनिएकाे छ।
विशेष महाधिवेशन पुस २७ गते भृकुटीमण्डपमा उद्घाटन हुने र त्यसपछिका विभिन्न कार्यक्रमका लागि उपसमितिहरू गठन गरिएको पनि पत्रकार सम्मेलनमा जानकारी दिइएकाे छ।
