काठमाडौँ । राष्ट्रिय स्वतन्त्र पार्टी (रास्वपा) का संसदीय दलका नेता बालेन्द्र शाह (बालेन) विधिवत् रूपमा मुलुकको नयाँ प्रधानमन्त्री नियुक्त भएका छन्।
राष्ट्रपति कार्यालय शीतल निवासमा आयोजित एक विशेष र भव्य समारोहका बीच राष्ट्रपति रामचन्द्र पौडेलले ३६ वर्षीय शाहलाई पद तथा गोपनीयताको शपथ गराएका हुन्।
नेपालको संसदीय इतिहासमा यति कम उमेरमै कार्यकारी प्रमुखको जिम्मेवारी सम्हाल्ने बालेन पहिलो नेता बनेका छन्।
प्रधानमन्त्री नियुक्तिको यो प्रक्रिया संवैधानिक रूपमा पनि ऐतिहासिक बनेको छ। नेपालको संविधान २०७२ जारी भएपछि पहिलोपटक धारा ७६ को उपधारा (१) बमोजिम प्रतिनिधि सभामा स्पष्ट बहुमत प्राप्त दलको नेताका रूपमा बालेनले सरकारको नेतृत्व गर्ने अवसर पाएका हुन्।
यसका साथै, मधेशी समुदायको व्यक्ति नेपालको प्रधानमन्त्री बनेको यो नै पहिलो ऐतिहासिक अवसर हो, जसले नेपाली राजनीतिमा समावेशिताको नयाँ मानक स्थापित गरेको छ।
बालेनको यो राजनीतिक छलाङ निकै रोचक र अभूतपूर्व छ। काठमाडौँ महानगरपालिकाको मेयर पदबाट राजीनामा दिएर गत फागुन २१ को निर्वाचनमा होमिएका शाह पहिलोपटक संसद् प्रवेश गर्नेबित्तिकै मुलुकको बागडोर सम्हाल्न सफल भएका हुन्।
उनले झापा क्षेत्र नम्बर ५ मा पूर्वप्रधानमन्त्री केपी शर्मा ओलीलाई झण्डै ५० हजारको फराकिलो मतान्तरले पराजित गर्दै आफ्नो उदयको बलियो संकेत दिएका थिए। आजको शपथ ग्रहणसँगै मुलुकले युवा नेतृत्वबाट नयाँ कार्यशैली र समृद्धिको अपेक्षा गरेको छ।
