काठमाडौँ । नेकपा एमालेका अध्यक्ष केपी शर्मा ओली पक्राउ परेपछि पार्टीका कार्यकर्ताहरू देशभर आन्दोलनमा उत्रिएका छन्। शनिबार बिहान अध्यक्ष ओलीलाई उहाँकै निवासबाट नियन्त्रणमा लिइएलगत्तै एमाले निकट जनसङ्गठनहरूले काठमाडौँका विभिन्न स्थानमा विरोध प्रदर्शन गरेका छन्।
एमाले कार्यकर्ताहरूले ललितपुरको च्यासलस्थित पार्टी कार्यालय बाहिर ‘जेनजी’ (Gen-Z) आन्दोलन जाँचबुझ आयोगको प्रतिवेदन जलाएका छन्। उनीहरूले वर्तमान बालेन शाह नेतृत्वको सरकारले ‘राजनीतिक प्रतिशोध’ साँधेको आरोप लगाउँदै आक्रोश व्यक्त गरेका छन्।
यसैगरी, एमाले निकट अनेरास्ववियुले काठमाडौँको भृकुटीमण्डपमा टायर बालेर प्रदर्शन गरेको छ। विद्यार्थी नेताहरूले अध्यक्ष ओलीलाई तत्काल रिहा गर्न माग गर्दै सरकारविरुद्ध चर्को नाराबाजी गरेका छन्। उनीहरूले पनि जाँचबुझ आयोगको प्रतिवेदन जलाएर आफ्नो असहमति प्रकट गरेका छन्।
एमाले सचिवालय बैठकले ओलीको गिरफ्तारीलाई ‘पूर्वाग्रहपूर्ण’ कदम भन्दै देशव्यापी आन्दोलनको घोषणा गरिसकेको छ। आजै अपराह्न ३ बजे सबै जिल्ला सदरमुकाममा प्रदर्शन र भोलि प्रमुख जिल्ला अधिकारी (CDO) मार्फत सरकारलाई विरोध पत्र बुझाउने निर्णय गरिएको छ। यस घटनाले मुलुकको राजनीतिमा नयाँ तरंग पैदा गरेको छ भने सुरक्षा व्यवस्थामा समेत कडाइ गरिएको छ।
