काठमाडौँ । नेकपा एमालेका संसदीय दलका नेता रामबहादुर थापाले फागुन २१ गते सम्पन्न प्रतिनिधिसभा सदस्यको निर्वाचनमा राष्ट्रिय स्वतन्त्र पार्टी (रास्वपा) पहिलो शक्ति हुनुका पछाडि विभिन्न अदृश्य शक्ति र निकायहरूको हात रहेको सनसनीपूर्ण आरोप लगाउनुभएको छ। बिहीबार नवनिर्वाचित प्रतिनिधिसभाको पहिलो बैठकलाई सम्बोधन गर्दै थापाले रास्वपाको उदय स्वाभाविक नभई नियोजित भएको दाबी गर्नुभयो।
सम्बोधनका क्रममा एमाले नेता थापाले रास्वपा पहिलो दल बन्नुमा देशका महत्वपूर्ण अंग र बाह्य प्रभाव रहेका संस्थाहरूलाई दोष दिनुभयो। “यो सबै परिणामका पछाडि मुख्यतः नेपाली सेना, ब्युरोक्रेसी (कर्मचारीतन्त्र), सुशीला सरकार र बारबरा फाउन्डेसन विजयका आधारहरू हुन्,” उहाँले भन्नुभयो। निर्वाचनको परिणामले स्थापित राजनीतिक दलहरूलाई धक्का दिएको समयमा एमालेको तर्फबाट यस्तो गम्भीर आरोप आएको हो।
थापाले रास्वपाको जितलाई केवल जनमत मात्र नभई संस्थागत सेटिङको उपजका रूपमा अर्थ्याउन खोज्नुभएको देखिन्छ। ‘जेनजी’ आन्दोलन र बालेन्द्र शाहको नेतृत्वमा भएको राजनीतिक फेरबदलले परम्परागत शक्तिहरू रक्षात्मक अवस्थामा पुगेका बेला एमालेले राज्यका तटस्थ भनिएका निकायहरूमाथि प्रश्न उठाएको छ। विशेष गरी सुरक्षा निकाय र कर्मचारीतन्त्रले रास्वपालाई सघाएको भन्ने थापाको तर्कले सदनमा नयाँ बहस र विवाद सिर्जना गरेको छ।
बालेन्द्र शाह नेतृत्वको सरकारमा रास्वपा मुख्य शक्ति रहेकाले पनि एमालेले यस प्रकारको आक्रामक रणनीति अपनाएको विश्लेषण गरिएको छ। थापाले आफ्नो सम्बोधनमा ती निकायहरूले कसरी र कुन प्रक्रियाबाट सहयोग गरे भन्ने ठोस प्रमाण भने पेस गर्नुभएन। एमालेको यो अभिव्यक्तिले आगामी दिनमा सत्तापक्ष र प्रतिपक्षबीचको सम्बन्ध थप चुनौतीपूर्ण हुने संकेत गरेको छ।
