काठमाडौँ । नेपाली कांग्रेसले गृहमन्त्री सुधन गुरुङ र विवादित व्यवसायी दीपक भट्टबीचको सेयर साझेदारी प्रकरणमा तत्काल स्वतन्त्र, निष्पक्ष र उच्चस्तरीय छानबिन गर्न सरकारसँग माग गरेको छ। पार्टी प्रवक्ता देवराज चालीसेले सोमबार एक विज्ञप्ति जारी गर्दै नैतिकता र पारदर्शिताको गम्भीर प्रश्न उठेको भन्दै छानबिनलाई प्रभावमुक्त बनाउन उपयुक्त वातावरण सुनिश्चित गर्न ध्यानाकर्षण गराउनुभएको हो। कांग्रेसले गृहमन्त्री पदमा बहाल रहँदा अनुसन्धान प्रभावित हुन सक्ने भन्दै यसमा हुने कुनै पनि ढिलासुस्तीले सुशासनमाथि आघात पुर्याउने चेतावनी दिएको छ।
उता, सोमबार नै बसेको राष्ट्रिय स्वतन्त्र पार्टी (रास्वपा) को केन्द्रीय समिति बैठकले भने आफ्नै दलका गृहमन्त्री गुरुङमाथि उठेका प्रश्नका बारेमा कुनै औपचारिक छलफल गरेन। प्रवक्ता मनिष झाले गृहमन्त्रीको विषय बैठकको पूर्वनिर्धारित एजेन्डामा नरहेकाले छलफल नभएको जानकारी दिनुभयो। बैठकमा कसैले पनि यस विषयमा प्रश्न नउठाएको र सचिवालयले तय गरेका सांगठनिक एजेन्डाहरू मात्र पारित गरिएको उहाँको जिकिर छ।
यद्यपि, विवादमा तानिएका गृहमन्त्री गुरुङले सोमबार सामाजिक सञ्जालमार्फत आफ्नो स्पष्टीकरण सार्वजनिक गर्नुभएको छ। उहाँले मन्त्री हुनुअघि नै बैंकिङ च्यानलमार्फत ऋण लिएर सेयर लगानी गरेको र सो विवरण सम्पत्ति विवरणमा समेत समावेश भएको दाबी गर्नुभएको छ। सभापति रवि लामिछानेले पनि गृहमन्त्रीको स्पष्टीकरण प्राप्त भएको र त्यसलाई पार्टीले अध्ययन गरिरहेको बताउनुभएको छ। तर, प्रमुख प्रतिपक्षी दल र जनस्तरबाट राजीनामाको दबाब बढिरहेका बेला रास्वपाको आधिकारिक बैठक भने मौन रहनुलाई अर्थपूर्ण रूपमा हेरिएको छ।
