काठमाडौँ । हाल नेपालमा उपल्लो वायुमण्डलमा रहेको पश्चिमी न्यून चापीय रेखाका साथै स्थानीय वायुको प्रभाव सक्रिय रहेको छ। मौसम पूर्वानुमान महाशाखाका अनुसार यस मौसमी प्रणालीका कारण हाल कोशी र सुदूरपश्चिम प्रदेश लगायत देशका हिमाली र पहाडी भू-भागमा साधारणतया बदली रहेको छ भने बाँकी भू-भागमा आंशिक बादल लागेको छ। अहिले कोशी प्रदेशका थोरै स्थानहरूमा चट्याङसहित हल्कादेखि मध्यम वर्षा भइरहेको छ।
आज दिउँसो देशको हिमाली र पहाडी भू-भागमा साधारणतया बादल लाग्नेछ भने तराई भू-भागमा आंशिक बदली रहनेछ। कोशी, बागमती, गण्डकी, लुम्बिनी, कर्णाली र सुदूरपश्चिम गरी ६ वटा प्रदेशका हिमाली तथा पहाडी भू-भागका थोरै स्थानहरूमा मेघगर्जन र चट्याङसहित हल्कादेखि मध्यम वर्षाको सम्भावना रहेको छ। यसैगरी, लुम्बिनी र सुदूरपश्चिम प्रदेशका तराई भू-भागका एक-दुई स्थानमा समेत चट्याङसहित वर्षाको अनुमान गरिएको छ।
पहाडी र हिमाली क्षेत्रमा वर्षाको सम्भावना रहँदा मधेश प्रदेश र कोशी प्रदेशको तराई भू-भागमा भने आज तातो दिन (लू) हुने सम्भावना रहेकाले आवश्यक सतर्कता अपनाउन महाशाखाले अनुरोध गरेको छ। आज राति भने देशको हिमाली भू-भागमा साधारणतया बादल र पहाडी भू-भागमा आंशिक बदली रही कोशी, कर्णाली, सुदूरपश्चिम, बागमती, गण्डकी र लुम्बिनी प्रदेशका उच्च पहाडी तथा हिमाली एक-दुई स्थानमा हल्का वर्षाको सम्भावना रहेको छ।
