काठमाडौँ । नेपालको उपल्लो वायुमण्डलमा हाल पश्चिमी न्यूनचापीय प्रणालीको आंशिक प्रभाव रहेको छ। जसका कारण कोशी, बागमती र गण्डकी प्रदेशका पहाडी तथा हिमाली भू-भागमा साधारणतया बदलीको अवस्था रहेको छ।
मौसम पूर्वानुमान महाशाखाका अनुसार आज दिउँसो कोशी, बागमती र गण्डकी प्रदेशको हिमाली भू-भागका थोरै स्थानहरूमा चट्याङ्गसहित हल्का वर्षा र हिमपातको सम्भावना रहेको छ। साथै, यी तीन प्रदेशका पहाडी भू-भागका एक-दुई स्थानमा पनि चट्याङ्गसहित हल्का वर्षा हुन सक्ने देखिएको छ। अन्य प्रदेशका हिमाली भू-भागमा पनि एक-दुई स्थानमा हल्का हिमपातको सम्भावना छ।
तराईका केही स्थानहरूमा बिहानको समयमा हुस्सु लागे पनि दिउँसोतिर मौसम मुख्यतया सफा रहनेछ। आज राति पनि कोशी र गण्डकी प्रदेशका हिमाली भू-भागका एक-दुई स्थानमा चट्याङ्गसहित हल्का वर्षा र हिमपातको सम्भावना कायमै रहने महाशाखाले जनाएको छ। तराईका थोरै स्थानहरूमा रातिको समयमा तुवाँलो लाग्न सक्नेछ।
