काठमाडौँ । बिहीबार नेपालका पहाडी तथा हिमाली भू-भागमा वर्षा र हिमपातको सम्भावना रहेको छ भने तराई क्षेत्रमा अत्यधिक गर्मीको जोखिम देखिएको छ। जल तथा मौसम विज्ञान विभागका अनुसार आज दिउँसो देशका हिमाली भू-भागमा साधारणतया बदली रहनेछ।
आज कोशी, गण्डकी र कर्णाली प्रदेशका हिमाली क्षेत्रका एक-दुई स्थानमा मेघगर्जन र चट्याङसहित मध्यम वर्षा तथा हिमपातको सम्भावना रहेको मौसम पूर्वानुमान महाशाखाले जनाएको छ। पहाडी भेगमा आंशिक बदली रहे पनि तराईमा भने मौसम मुख्यतया सफा रहनेछ।
पहाड र हिमालमा मौसमी सक्रियता देखिए पनि तराईका जिल्लाहरूमा भने गर्मीले जनजीवन प्रभावित बनाउने देखिएको छ। मधेस, कोशी, बागमती, गण्डकी, लुम्बिनी र सुदूरपश्चिम प्रदेशका तराई क्षेत्र, उपत्यका र खोँचहरूमा आज ‘तातो दिन’ हुने सम्भावना छ। विशेष गरी लुम्बिनी र सुदूरपश्चिमका तराई क्षेत्रमा तातो लहर (Heat Wave) चल्न सक्ने भन्दै महाशाखाले सतर्कता अपनाउन अनुरोध गरेको छ। आज राति कोशी प्रदेशका पहाडी र हिमाली भेगमा हल्का वर्षाको सम्भावना रहे पनि अन्य क्षेत्रमा मौसम सफा रहनेछ।
