काठमाडौँ । हाल नेपालमा पश्चिमी वायु र स्थानीय वायुको संयुक्त प्रभाव रहेको मौसम पूर्वानुमान महाशाखाले जनाएको छ। यसै मौसमी प्रणालीका कारण अहिले देशको पहाडी तथा हिमाली भू-भागमा साधारणतया बदली (बादल लाग्ने) भएको छ भने तराईका बाँकी क्षेत्रमा मौसम मुख्यतया सफा रहेको छ। महाशाखाका अनुसार आज दिउँसो कोशी, मधेश, बागमती र गण्डकी प्रदेश लगायत लुम्बिनी र कर्णाली प्रदेशको हिमाली तथा पहाडी भू-भागमा साधारणतया बादल लाग्ने अनुमान गरिएको छ।
आज कोशी, बागमती र गण्डकी प्रदेशका केही स्थानहरूमा तथा मधेश प्रदेश लगायत बाँकी हिमाली र पहाडी भू-भागका थोरै स्थानहरूमा हल्कादेखि मध्यमसम्म वर्षा र उच्च पहाडी तथा हिमाली भेगमा हिमपातको सम्भावना रहेको छ। पहाडी क्षेत्रमा वर्षा र बदलीको अवस्था रहँदा सुदूरपश्चिम र लुम्बिनी प्रदेशका तराई भू–भागमा भने अत्यधिक गर्मी बढेर ‘तातो दिन’ (Heat Wave/लू) हुने सम्भावना रहेकाले आवश्यक सतर्कता अपनाउन महाशाखाले विशेष अनुरोध गरेको छ।
आज राति कोशी, मधेश, बागमती र गण्डकी प्रदेशमा साधारणतया बादल लाग्नेछ भने बाँकी पहाडी र हिमाली भू-भागमा आंशिक बदली रहनेछ। रातिको समयमा कोशी, मधेश, बागमती र गण्डकी प्रदेशका एक–दुई स्थानमा मेघगर्जन र चट्याङ्गसहित हल्का वर्षा तथा हिमपातको सम्भावना रहेको महाशाखाले जनाएको छ। मौसममा आउने यस्तो उतारचढाव र चट्याङ्गको जोखिमलाई मध्यनजर गर्दै आवश्यक सावधानी अपनाउन मौसमविद्हरूले सुझाव दिएका छन्।
