काठमाडौँ । हाल नेपालमा पश्चिमी वायु, स्थानीय वायुका साथै देशको पूर्वी भूभाग नजिक रहेको न्यून चापीय क्षेत्रको संयुक्त प्रभाव रहेको मौसम पूर्वानुमान महाशाखाले जनाएको छ। यस मौसमी प्रणालीका कारण हाल कोशी, मधेस, बागमती र गण्डकी प्रदेशको पहाडी तथा हिमाली भू-भागमा साधारणतया बादल लागेको छ भने बाँकी क्षेत्रमा आंशिक बदली रहेको छ। अहिले गण्डकी र बागमती प्रदेशका थोरै स्थानहरूमा मेघगर्जन र चट्याङ्गसहित हल्कादेखि मध्यम वर्षा भइरहेको महाशाखाले उल्लेख गरेको छ।

आज दिउँसो कोशी, मधेस, बागमती र गण्डकी प्रदेश लगायत बाँकी प्रदेशका हिमाली तथा पहाडी भू-भागमा साधारणतया बादल लाग्ने अनुमान छ। दिउँसो कोशी, बागमती र गण्डकी प्रदेशका हिमाली तथा पहाडी भू-भागको केही स्थानहरूमा तथा मधेस प्रदेश लगायत कोशी, बागमती, गण्डकी प्रदेशका तराई र लुम्बिनी तथा कर्णाली प्रदेशको हिमाली र पहाडी भू-भागका थोरै स्थानहरूमा चट्याङ्गसहित मध्यमसम्म वर्षाको सम्भावना रहेको छ। पहाडी र पूर्वी क्षेत्रमा वर्षाको सम्भावना रहँदा पश्चिम नेपालमा भने गर्मीको उच्च जोखिम छ। सुदूरपश्चिम प्रदेशका पहाडी तथा तराई भू-भागमा ‘तातो लहर’ (Heat Wave/लू) चल्ने सम्भावना र लुम्बिनी प्रदेशका पहाडी तथा तराई भू-भागमा ‘तातो दिन’ हुने सम्भावना रहेकाले आवश्यक सतर्कता अपनाउन महाशाखाले विशेष अनुरोध गरेको छ।

आज राति कोशी, मधेस, बागमती र गण्डकी प्रदेशमा साधारणतया बादल लाग्नेछ। बाँकी प्रदेशका हिमाली तथा पहाडी भू-भागमा आंशिक बदली रहनेछ भने बाँकी तराई क्षेत्रमा मौसम मुख्यतया सफा रहनेछ। रातिको समयमा पनि कोशी, मधेस, बागमती र गण्डकी प्रदेशका थोरै स्थानहरूमा चट्याङ्गसहित हल्कादेखि मध्यमसम्म वर्षाको सम्भावना कायमै रहने महाशाखाको बुलेटिनमा उल्लेख छ। मौसममा आउने यस्तो उतारचढाव, चट्याङ्गको जोखिम र तराईमा बढ्दो तातो लहरलाई मध्यनजर गर्दै सबैलाई सुरक्षित र सतर्क रहन मौसमविद्हरूले सुझाव दिएका छन्।