काठमाडौँ । सङ्घीय संसद्, प्रतिनिधिसभा अन्तर्गतका तीनवटा महत्त्वपूर्ण संसदीय समितिको बैठक आज बस्दैछ। संसद् सचिवालयका अनुसार आज सार्वजनिक लेखा समिति, शिक्षा, स्वास्थ्य तथा सूचना प्रविधि समिति र अन्तर्राष्ट्रिय सम्बन्ध तथा पर्यटन समितिको बैठक तय भएको हो। संसदीय समितिहरूले आफ्ना गतिविधिलाई तीव्रता दिँदै महत्त्वपूर्ण विधेयक र सरकारी कामकारबाहीको निगरानीमा जोड दिएका छन्।
बिहान ९ बजे सिंहदरबारमा बस्ने सार्वजनिक लेखा समितिको बैठकमा समितिको आन्तरिक कार्यविधि पारित गर्ने र बेरुजु छलफलका लागि छुट्टै उपसमिति गठन गर्ने विषयमा महत्त्वपूर्ण छलफल हुने कार्यसूची रहेको छ। सोही समयमा बस्ने शिक्षा, स्वास्थ्य तथा सूचना प्रविधि समितिको बैठकमा भने ‘राष्ट्रिय विधि विज्ञान प्रयोगशाला (स्थापना र सञ्चालन) विधेयक, २०८१’ माथि गहन छलफल हुनेछ। यस बैठकमा विज्ञान, प्रविधि तथा नवप्रवर्तन मन्त्री, सम्बन्धित मन्त्रालयका सचिवहरू र प्रयोगशालाका कार्यकारी निर्देशकलाई आमन्त्रण गरिएको छ।
यसैगरी, बिहान साढे ९ बजे बस्ने अन्तर्राष्ट्रिय सम्बन्ध र पर्यटन समितिको बैठकमा परराष्ट्रमन्त्रीले हालै गर्नुभएको भारत र चीन भ्रमणका विषयमा समितिलाई औपचारिक जानकारी गराउने कार्यक्रम रहेको छ। यसका साथै अन्य समसामयिक राजनीतिक तथा कूटनीतिक विषयमा समेत छलफल हुने उक्त बैठकमा परराष्ट्रमन्त्री र मन्त्रालयका सचिवको विशेष उपस्थिति रहने बताइएको छ।
