काठमाडौँ । मुलुकभर मनसुनी वायुको प्रभाव कायम रहँदा आज (बुधबार) देशभरको मौसममा उल्लेख्य बदलाब आउने जल तथा मौसम विज्ञान विभागले जनाएको छ। देशभर साधारणतया बादल लाग्नेछ भने पहाडी तथा तराई भू-भागका अधिकांश स्थानमा वर्षा र हिमाली क्षेत्रमा हिमपातको सम्भावना रहेको छ।
आज दिउँसो देशका हिमाली भू-भागका केही स्थानमा मध्यमसम्मको वर्षा तथा हिमपात हुनेछ। पहाडी भू-भागका धेरै स्थानमा र तराई भू-भागका केही स्थानमा मेघगर्जन र चट्याङ्गसहित मध्यम वर्षाको सम्भावना छ। विशेष गरी कोशी र बागमती प्रदेशका हिमाली तथा पहाडी भू-भाग, गण्डकी र लुम्बिनी प्रदेशका पहाडी तथा तराई भू-भागका साथै कर्णाली र सुदूरपश्चिम प्रदेशको पहाडी भू-भागका एक-दुई स्थानमा भारी वर्षाको सम्भावना रहेको हुनाले आवश्यक सतर्कता अपनाउन मौसमविद्हरूले आग्रह गरेका छन्।
त्यसैगरी आज राति पनि देशभरको मौसम पूर्ण रूपमा बदली नै रहनेछ। रातिको समयमा हिमाली भू-भागका केही स्थानमा हिमपात तथा कोशी, बागमती, गण्डकी र लुम्बिनी प्रदेशका पहाडी र तराई भू-भाग साथै मधेश प्रदेशका धेरै स्थानमा मेघगर्जन र चट्याङ्गसहित मध्यम वर्षाको पूर्वानुमान गरिएको छ।
रातिको समयमा कोशी, बागमती र गण्डकी प्रदेशका हिमाली र पहाडी भू-भाग तथा लुम्बिनी प्रदेशको पहाडी र तराई भू-भागका एक-दुई स्थानमा भारी देखि धेरै भारी वर्षाको उच्च जोखिम रहेको छ। लगातारको वर्षाका कारण गेग्रान बहाव, बाढी, पहिरो तथा डुबानको खतरा रहने भएकाले नदी तटीय क्षेत्र तथा पहिरोग्रस्त इलाकाका बासिन्दालाई विशेष सचेत रहन अपिल गरिएको छ।
