काठमाडौँ । अविरल वर्षाका कारण यही असोज ८ गतेदेखि देशका विभिन्न स्थानमा आएको बाढी तथा पहिरोलगायतका प्राकृतिक विपद्मा परी हालसम्म ६ जनाको मृत्यु भएको छ। विपद्का कारण मानवीय क्षतिका साथै विभिन्न जिल्लामा जनजीवन प्रभावित बनेको छ।
केन्द्रीय प्रहरी प्रवक्ता अविनारायण काफ्लेका अनुसार विपद्मा परेर बागमती र लुम्बिनी प्रदेशमा दुई/दुई जना तथा गण्डकी र कर्णाली प्रदेशमा एक/एक जना गरी कुल छ जनाले ज्यान गुमाएका छन्। बाढी तथा पहिरोका घटनाहरूमा परी अन्य दुई जना घाइते भएका छन् र उनीहरूको स्थानीय अस्पतालमा उपचार भइरहेको प्रहरीले जनाएको छ।
यसैबिच, विपद् प्रभावित जोखिमयुक्त स्थानहरूबाट सुरक्षाकर्मीको टोलीले हालसम्म ४०७ जना नागरिकको सकुशल उद्धार गरेको छ। देशका विभिन्न नदी–खोलाहरूमा जलसतह बढेको र पहाडी भू-भागमा पहिरोको जोखिम कायमै रहेकाले सम्भावित जोखिमयुक्त क्षेत्रमा खोज, उद्धार तथा सतर्कताका लागि सुरक्षा निकायहरूलाई तयारी अवस्थामा राखिएको छ।
