बेइजिङ / वासिङ्टन । आर्टिफिसियल इन्टेलिजेन्स (एआई) को नाम परिवर्तन गरी ‘सुपर इन्टेलिजेन्स’ (एसआई) राख्ने अमेरिकी राष्ट्रपति डोनाल्ड ट्रम्पको निर्णय वा शब्दावलीलाई चीनले सम्मान गर्ने जनाएको छ। हालै दुई देशका शीर्ष नेतृत्वबिच भएको वार्तापछि राष्ट्रपति ट्रम्पले एआईलाई ‘सुपर इन्टेलिजेन्स’ नामाकरण गर्नुपर्ने र यसमा चिनियाँ राष्ट्रपति सी चिनफिङ पनि सहमत देखिएको दाबी गरेका थिए।
राष्ट्रपति ट्रम्पले हाल प्रचलनमा रहेको ‘आर्टिफिसियल इन्टेलिजेन्स’ नाम अपूर्ण र प्राविधिक यथार्थभन्दा कमजोर रहेको तर्क गर्दै यसलाई ‘सुपर इन्टेलिजेन्स’ भन्नु बढी सान्दर्भिक हुने उल्लेख गरेका थिए। अमेरिकी पक्षको उक्त नामाकरण प्रस्तावप्रति प्रतिक्रिया दिँदै चिनियाँ विदेश मन्त्रालयले अमेरिकाको शब्दावली चयनलाई सम्मान गर्ने बताएको छ। यद्यपि, चीनले प्रविधिलाई जुनसुकै नाम दिइए तापनि यसको तीव्र विकाससँगै प्रभावकारी नियमन, मानव हितमा उपयोग र प्रविधि सधैँ मानवीय नियन्त्रणभित्रै रहनुपर्ने पक्षलाई प्राथमिकतामा राखेको छ।
चिनियाँ राष्ट्रपति सी चिनफिङले यसअघि एआई क्षेत्रमा अमेरिका र चीन दुवै अग्रणी शक्ति भएकाले यस प्रविधिको सुरक्षित र उत्तरदायी विकास सुनिश्चित गर्नु दुवै देशको साझा जिम्मेवारी भएको स्पष्ट पारेका थिए। उनले तीव्र रूपमा विकास भइरहेको प्रविधिको व्यवस्थापन गर्न र जोखिम न्यूनीकरणका उपायहरू पहिल्याउन अन्तर्राष्ट्रियस्तरमा संवाद तथा सहकार्य अझ गहिरो बनाउनुपर्नेमा जोड दिएका छन्।
