काठमाडौँ । फिफा विश्वकप २०२६ को प्रि-क्वाटरफाइनलमा साविक विजेता अर्जेन्टिनासँग ३-२ गोलले पराजित भएपछि इजिप्टका मुख्य प्रशिक्षक होसाम हसनले रेफ्री र भिडियो असिस्टेन्ट रेफ्री (भीएआर) माथि गम्भीर आरोप लगाएका छन्। दुई गोलको अग्रता जोगाउन नसक्दा प्रतियोगिताबाट बाहिरिएको इजिप्टका प्रशिक्षक हसनले लियोनेल मेस्सी र अर्जेन्टिनालाई विश्वकपमा टिकाइराख्न बाह्य शक्तिले झेल गरेको दाबी गरेका हुन्।
खेलपछि सञ्चारकर्मीहरूसँग आक्रोशित रूपमा प्रस्तुत भएका हसनले प्राविधिक रूपमा आफ्नो टोली उत्कृष्ट भए पनि नतिजा नियोजित रूपमा प्रभावित पारिएको बताए। उनले भने, “उनीहरू विश्व च्याम्पियनलाई प्रतियोगितामा टिकाइराख्न चाहन्थे र मेस्सीलाई उपाधि दौडबाट बाहिर पठाउन चाहेनन्। यसैकारण हामीमाथि चरम अन्याय भयो।” उनले इजिप्टको एउटा वैध गोललाई विनाकारण रद्द गरिएको र कप्तान मोहम्मद सलाहमाथि डिबक्सभित्र भएको प्रस्ट फाउलमा समेत पेनाल्टी नदिइएको गुनासो गरे।
साथै, खेलको अन्तिम समयमा इन्जो फर्नान्डेजले निर्णायक गोल गर्नुअघि अर्जेन्टिनाका एलेक्सिस म्याक एलिस्टरले इजिप्सेली खेलाडीको जर्सी तानेको स्पष्ट दृश्यलाई पनि भीएआरले बेवास्ता गरेको हसनको आरोप छ। खेलमा मेस्सीको पेनाल्टी उत्कृष्ट रूपमा बचाएका गोलकिपर मोस्तफा सोबियर र दोस्रो गोलकर्ता मोस्तफा जिको लगायतका खेलाडीहरूले पनि प्रशिक्षकको भनाइमा सहमति जनाउँदै रेफ्रीको निर्णय पक्षपातपूर्ण रहेको बताएका छन्।
तनावपूर्ण खेलको अन्त्यमा प्रशिक्षक हसन र मुख्य रेफ्री फ्रान्स्वा लेटेक्सियरबिच भनाभन समेत भएको थियो। चरम निराशा व्यक्त गर्दै प्रशिक्षक हसनले अब विश्वकपका बाँकी कुनै पनि खेल नहेर्ने घोषणा गरेका छन्। यद्यपि, टोलीका कप्तान मोहम्मद सलाहले भने हारपछि ड्रेसिङ रुममा साथीहरूलाई सम्झाउँदै यसलाई ‘भाग्यको खेल’ का रूपमा लिन र संयमता अपनाउन आग्रह गरेका थिए।
