इस्लामावाद । अमेरिकी उपराष्ट्रपति जेडी भान्सको पछिल्लो अभिव्यक्तिले अमेरिका र इरानबीचको रणनीतिक वार्तामा नयाँ र कठोर मोड ल्याएको छ। २१ घण्टा लामो सघन छलफलपछि उपराष्ट्रपति भान्सले इरानको परमाणु कार्यक्रमका सम्बन्धमा वासिङ्टनको अडान निकै कडा भएको सङ्केत गर्नुभएको हो।
भान्सका अनुसार अमेरिकाले इरानको परमाणु कार्यक्रम सुरु गर्ने वर्तमान क्षमतालाई पूर्ण रूपमा नष्ट गरिसकेको छ। तर अबको वार्ता केवल युरेनियम प्रवर्द्धन रोक्ने विषयमा मात्र सीमित रहने छैन। अमेरिकाले इरानसँग भविष्यमा कहिल्यै पनि यस्तो कार्यक्रमको ‘सोच समेत नराख्ने’ लिखित प्रतिबद्धता माग गरेको छ। यसलाई कूटनीतिक वृत्तमा एक ठूलो ‘रणनीतिक शिफ्ट’ मानिएको छ, जसले वार्ताको सम्पूर्ण आधार नै परिवर्तन गरिदिएको छ।
उपराष्ट्रपति भान्सले यसलाई “अन्तिम प्रस्ताव” (Final Offer) का रूपमा प्रस्तुत गर्दै निर्णय गर्ने बल इरानको कोर्टमा रहेको स्पष्ट पार्नुभएको छ। “मान्ने भए मान, नत्र छोडिदेऊ” भन्ने शैलीको यो कठोर सर्तले मध्यपूर्वको राजनीति र विश्वव्यापी शक्ति सन्तुलनमा नयाँ हलचल ल्याउने निश्चित देखिएको छ। इरानले यस विषयमा कस्तो प्रतिक्रिया दिन्छ भन्ने कुराले नै आगामी दिनमा दुई देशबीचको कूटनीतिक सम्बन्ध र क्षेत्रीय शान्तिको भविष्य तय गर्नेछ।
