काठमाडौँ । राष्ट्रिय स्वतन्त्र पार्टी (रास्वपा) को सचिवालय बैठक आज बिहान १० बजे पार्टी कार्यालय वनस्थलीमा बस्दैछ। यसअघि शनिबार नै बस्ने भनिएको बैठक सभापति रवि लामिछाने अस्वस्थ भएपछि आजका लागि सारिएको थियो। सभापतिको स्वास्थ्यमा सुधार आएपछि आज बस्न लागेको यस बैठकलाई निकै चासोका साथ हेरिएको छ।
यस बैठकको मुख्य कार्यसूची प्रतिनिधिसभा सदस्य निर्वाचन २०८२ को समानुपातिकतर्फका उम्मेदवारहरूको अन्तिम सिफारिस गर्नु रहेको छ। निर्वाचन आयोगले समानुपातिक सांसदहरूको अन्तिम सूची बुझाउन आजसम्मको समयसीमा दिएकाले रास्वपाले क्लस्टरअनुसारका नामहरू आजै टुंगो लगाउनेछ। समानुपातिकतर्फ प्राप्त मतका आधारमा रास्वपाले ५७ सिट प्राप्त गरेको छ।
बैठकमा अर्को महत्त्वपूर्ण विषय वरिष्ठ नेता बालेन शाहलाई संसदीय दलको नेता बनाउने प्रक्रियाबारे छलफल हुने बताइएको छ। प्रत्यक्षतर्फ १२५ सिट जितेर संसद्को सबैभन्दा ठूलो दल बनेको रास्वपामा शाहलाई संसदीय जिम्मेवारी सुम्पिने र भावी सरकारको नेतृत्व गर्ने विषयमा गहन संवाद हुनेछ। बैठकले संसदीय दलको नेता चयनका लागि आवश्यक कानुनी र प्राविधिक कदमहरू तय गर्ने बुझिएको छ।
प्रतिनिधिसभामा प्रत्यक्षतर्फका १२५ र समानुपातिकतर्फका ५७ गरी रास्वपाका कुल १८२ सांसद रहने निश्चित भइसकेको छ। दुई तिहाइ बहुमत नजिक रहेको रास्वपाका लागि आजको सचिवालय बैठकले गर्ने निर्णयले मुलुकको आगामी सत्ता समीकरण र राजनीतिक दिशा तय गर्न निर्णायक भूमिका खेल्ने देखिएको छ।
