काठमाडौँ । संघीय संसद् सचिवालयको आह्वानमा आज प्रतिनिधिसभामा प्रतिनिधित्व गर्ने राजनीतिक दलहरूको महत्वपूर्ण बैठक बस्ने भएको छ। संसद्का महासचिव पद्मप्रसाद पाण्डेका अनुसार दिउँसो २:०० बजे सिंहदरबारस्थित संसद् सचिवालयमा रहेको महासचिवको कार्यकक्षमा यो बैठक बस्ने तय भएको हो।
गत फागुन २१ गते सम्पन्न प्रतिनिधिसभा निर्वाचनबाट चुनिएका ६ वटा राजनीतिक दलका प्रतिनिधिहरूलाई बैठकमा आमन्त्रण गरिएको छ। यसपटकको निर्वाचनबाट राष्ट्रिय स्वतन्त्र पार्टी (रास्वपा), नेपाली कांग्रेस, नेकपा एमाले, नेपाली कम्युनिस्ट पार्टी, श्रम संस्कृति पार्टी र राष्ट्रिय प्रजातन्त्र पार्टी (राप्रपा) ले मात्र प्रतिनिधिसभामा आफ्नो उपस्थिति जनाउन सफल भएका छन्।
बैठकमा विशेष गरी आगामी चैत १९ गतेका लागि आह्वान गरिएको संसद्को पहिलो अधिवेशनको तयारी, सांसदहरूको शपथ ग्रहण कार्यक्रम, सिट व्यवस्थापन र अन्य प्राविधिक विषयमा छलफल हुने महासचिव पाण्डेले जानकारी दिनुभएको छ। सचिवालयले नयाँ संसद्लाई कसरी व्यवस्थित र प्रभावकारी रूपमा अगाडि बढाउने भन्ने विषयमा दलहरूको सुझाव लिने तयारी गरेको छ।
नयाँ निर्वाचन प्रणाली र राजनीतिक समीकरणका कारण यसपटक संसद्मा दलहरूको संख्या घटेर ६ मा सीमित भएको छ। बालेन्द्र शाहको नेतृत्वमा नयाँ सरकार गठन भइसकेको र ‘जेनजी’ आन्दोलनपछिको बदलिएको राजनीतिक परिवेशमा बस्न लागेको यो पहिलो सर्वदलीय बैठकलाई निकै चासोका साथ हेरिएको छ। बैठकले संसद्को पहिलो बैठकका सम्भावित कार्यसूचीहरूका बारेमा पनि प्रारम्भिक खाका तयार पार्ने बुझिएको छ।
