काठमाडौँ । नेपाली कांग्रेसका पाका नेता एवं समानुपातिक सांसद अर्जुननरसिंह केसीले आफू र पार्टी सभापति गगनकुमार थापाको पारिवारिक सम्बन्धलाई लिएर हुने गरेका टिकाटिप्पणीप्रति कडा आपत्ति जनाउनुभएको छ। “ससुरा–ज्वाइँ” को ट्याग भिराएर आफ्नो राजनीतिक उचाइ र योगदानलाई अवमूल्यन गर्न खोजिएको भन्दै उहाँले यस्ता कुरा बनिबनाउ षड्यन्त्र मात्र भएको दाबी गर्नुभयो।
नेपाली कांग्रेसभित्रैको एक तप्काले आफ्नो पहिचानलाई केवल ‘गगन थापाको ससुरा’ मा सीमित गर्न खोजेकोमा असन्तुष्टि जनाउँदै केसीले भन्नुभयो, “२०१७ सालमा राजा महेन्द्रको ‘कू’ विरुद्ध पर्चा बाँड्दादेखि मेरो राजनीतिक यात्रा र जेल जीवन सुरु भएको हो। मेरो आफ्नै छुट्टै पहिचान र इतिहास छ।” उहाँले पार्टी निर्माण र लोकतन्त्रका लागि आफूले गरेको संघर्षबारे नबुझ्नेहरूले मात्र यस्तो सतही टिप्पणी गर्ने गरेको बताउनुभयो।
पशुपति दर्शनमा ‘छिद्रको व्यापार’ भनेझैँ आफ्नो नाम सभापतिसँग जोडेर प्रहार गर्न खोजिएको केसीको तर्क छ। पूर्वप्रधानमन्त्री गिरिजाप्रसाद कोइराला, सुशील कोइराला र नेतृ शैलजा आचार्यको उदाहरण दिँदै उहाँले पार्टीमा धेरै नेताहरूले पारिवारिक सम्बन्धभन्दा पनि आफ्नै क्षमताका आधारमा स्थान बनाएको जिकिर गर्नुभयो। आफू रूपान्तरण र पुस्तान्तरणको पक्षमा उभिएकै कारण एउटा समूहले आफूलाई निशाना बनाएको उहाँको बुझाइ छ।
सञ्चारकर्मीहरूसँग कुरा गर्दै नेता केसीले आफ्नो योगदानको सही मूल्याङ्कन गरिदिन आग्रह समेत गर्नुभयो। बालेन्द्र शाह नेतृत्वको सरकार र ‘जेनजी’ आन्दोलनले राजनीतिमा नयाँ मानक खोजिरहेका बेला कांग्रेसभित्रको यो आन्तरिक खिचातानी र पुस्तान्तरणको बहसले थप महत्त्व पाएको छ। केसीले आफू सधैँ कांग्रेसलाई सुदृढ बनाउन विशेष अधिवेशनको पक्षमा रहेको र यस्ता प्रहारले आफ्नो निष्ठामा कुनै फरक नपर्ने प्रष्ट पार्नुभयो।
