काठमाडौँ । राष्ट्रिय स्वतन्त्र पार्टी (रास्वपा) को सचिवालय बैठक आज आइतबार दिउँसो ३:३० बजे वनस्थलीस्थित पार्टी केन्द्रीय कार्यालयमा बस्दैछ। सभापति रवि लामिछानेले आह्वान गर्नुभएको यस बैठकमा पार्टीको साङ्गठनिक विस्तार र आगामी महाधिवेशनको तयारीलाई लक्षित गरी ६ वटा मुख्य कार्यसूची (एजेन्डा) तय गरिएको प्रवक्ता मनिष झाले जानकारी दिनुभएको छ।
बैठकमा मुख्य रूपमा ‘जिल्ला अधिवेशन कार्यविधि २०८३’ माथि छलफल गरिनेछ भने महाधिवेशन कार्यविधि मस्यौदा समिति गठनको निर्णय समेत लिइनेछ। यसका साथै पार्टीको आर्थिक व्यवस्थापनका लागि बैंक खाता सञ्चालन र पारदर्शिताका विषयमा पनि विस्तृत छलफल हुनेछ। पार्टी संरचनालाई पूर्णता दिन केन्द्रीय आयोग, सल्लाहकार परिषद्, सङ्घीय नेतृत्व मञ्च र विभिन्न विभागहरूमा गरिने मनोनयनका विषयमा सचिवालयले ठोस निर्णय लिने बताइएको छ।
रास्वपाले यसपटक नयाँ प्रयोगका रूपमा ‘विज्ञहरूको आह्वान’ र ‘योजनाहरूको आह्वान’ लाई पनि बैठकको मुख्य एजेन्डामा समावेश गरेको छ। विविध अन्तर्गत प्रतिनिधिसभा सदस्यहरूको साङ्गठनिक जिम्मेवारी बाँडफाँट, आगामी केन्द्रीय समिति बैठकको तयारी र संसदीय दलका लागि आवश्यक प्राविधिक सहायता एवं लेबीका विषयमा पनि छलफल हुने प्रवक्ता झाले बताउनुभयो। यो बैठकले पार्टीको आगामी राजनीतिक दिशा र साङ्गठनिक सुदृढीकरणका लागि महत्त्वपूर्ण मार्गदर्शन गर्ने अपेक्षा गरिएको छ।
