काठमाडौँ । हाल नेपालमा पश्चिमी न्यूनचापीय प्रणाली, स्थानीय वायु र तल्लो वायूमण्डलमा रहेको न्यून चापीय क्षेत्रको संयुक्त प्रभाव देखिएको छ। मौसम पूर्वानुमान महाशाखाका अनुसार यसकै प्रभावले हाल कोशी, मधेस, बागमती, गण्डकी र लुम्बिनी प्रदेश लगायत देशका हिमाली र पहाडी भू-भागमा साधारणतया बदली रहेको छ। अहिले कोशी र बागमती प्रदेशका केही स्थानहरू तथा लुम्बिनी र गण्डकी प्रदेशका थोरै स्थानहरूमा मध्यम वर्षा भइरहेको छ।
आज दिउँसो कोशी, बागमती र गण्डकी प्रदेश लगायतका हिमाली र पहाडी भू-भागमा साधारणतया बदली रहनेछ। महाशाखाका अनुसार कोशी प्रदेश लगायत बागमती र गण्डकीका पहाडी भू-भागका केही स्थानहरूमा चट्याङ्गसहित वर्षाको सम्भावना रहेको छ। साथै, मधेस र लुम्बिनी प्रदेशका तराईका एक-दुई स्थानमा पनि वर्षा र उच्च हिमाली भेगमा हिमपातको सम्भावना रहेको छ।
आज राति पनि कोशी, मधेस, बागमती र गण्डकी प्रदेश लगायतका हिमाली क्षेत्रमा साधारणतया बादल लाग्ने प्रक्षेपण गरिएको छ। कोशी र मधेस प्रदेशका थोरै स्थानहरूका साथै बागमती, गण्डकी र कर्णाली प्रदेशको हिमाली भू-भागका एक-दुई स्थानमा चट्याङ्गसहित मध्यम वर्षा र हिमपात हुन सक्ने महाशाखाले जनाएको छ। वर्षा र हिमपातको सम्भावना रहेकाले आवश्यक सतर्कता अपनाउन मौसमविद्हरूले सुझाव दिएका छन्।
