काठमाडौँ । हाल नेपालमा स्थानीय वायु, पश्चिमी वायुका साथै न्यून चापीय प्रणालीको प्रभाव कायम रहँदा मौसममा उल्लेखनीय उतारचढाव देखिएको छ। मौसम पूर्वानुमान महाशाखाका अनुसार आज २०८३ जेठ ९ गते शनिबार देशका विभिन्न भागमा वर्षा, हिमपात र अत्यधिक गर्मी (तातो लहर) को समान्तर प्रभाव रहने सम्भावना छ।
आज दिउँसो कोशी, बागमती र गण्डकी प्रदेशमा साधारणतया बदली रहनेछ भने मधेश प्रदेश लगायत बाँकी प्रदेशको हिमाली तथा पहाडी भू-भागमा आंशिक बदली हुनेछ। बाँकी तराई क्षेत्रमा भने मौसम मुख्यतया सफा रहने महाशाखाले जनाएको छ। दिउँसो कोशी, बागमती र गण्डकी प्रदेशका हिमाली तथा पहाडी भू-भागको केही स्थानहरूमा, मधेश प्रदेश लगायत कोशी, बागमती, गण्डकी प्रदेशका तराई भू-भागका थोरै स्थानहरूमा तथा लुम्बिनी, कर्णाली र सुदूरपश्चिम प्रदेशको हिमाली र पहाडी भू-भागका एक-दुई स्थानमा मेघगर्जन र चट्याङ्गसहित हल्कादेखि मध्यमसम्मको वर्षा र हिमपातको सम्भावना रहेको छ। पूर्वी र मध्य पहाडी क्षेत्रमा वर्षाको सम्भावना रहँदा पश्चिम नेपालमा भने गर्मीको प्रकोप बढ्नेछ। सुदूरपश्चिम र लुम्बिनी प्रदेशका पहाडी भू–भागमा ‘तातो दिन’ हुने तथा तराई भू–भागमा ‘तातो लहर’ (Heat Wave/लू) चल्ने सम्भावना रहेकाले आवश्यक सतर्कता अपनाउन महाशाखाले विशेष अपिल गरेको छ।
आज राति कोशी, मधेश, बागमती र गण्डकी प्रदेशमा साधारणतया बादल लाग्नेछ। बाँकी प्रदेशका हिमाली तथा पहाडी भू-भागमा आंशिक बदली रहनेछ भने बाँकी तराई भू-भागमा मौसम मुख्यतया सफा रहनेछ। रातिको समयमा कोशी प्रदेशका केही स्थानहरूमा, मधेश प्रदेश लगायत बागमती र गण्डकी प्रदेशका हिमाली तथा पहाडी भू-भागका थोरै स्थानहरूमा र कर्णाली प्रदेशको हिमाली भू-भागका एक-दुई स्थानमा मेघगर्जन र चट्याङ्गसहित मध्यमसम्म वर्षा र हिमपातको सम्भावना रहेको महाशाखाको बुलेटिनमा उल्लेख छ। चट्याङ्ग, वर्षा, उच्च हिमाली क्षेत्रको हिमपात र तराईमा चल्ने तातो लहर (लू) बाट बच्न दैनिक जनजीवनमा सतर्कता अपनाउन मौसमविद्हरूले सुझाव दिएका
छन्।
