धर्मशाला । रोयल च्यालेन्जर्स बेंगलुरु इन्डियन प्रिमियर लिग (आईपीएल) २०२६ को फाइनलमा प्रवेश गरेको छ। धर्मशालामा मंगलबार राति सम्पन्न क्वालिफायर-१ खेलमा गुजरात टाइटन्सलाई ९२ रनको भारी अन्तरले पराजित गर्दै साविक विजेता बेंगलुरुले लगातार दोस्रो सिजन फाइनलको यात्रा तय गरेको हो।
टस हारेर पहिले ब्याटिङ गरेको बेंगलुरुले निर्धारित २० ओभरमा ५ विकेट गुमाएर २५४ रनको विशाल योगफल तयार पारेको थियो। यो स्कोर आईपीएल प्लेअफ वा नकआउट इतिहासकै सबैभन्दा उच्च योगफल हो। बेंगलुरुका लागि कप्तान रजत पाटीदारले विष्फोटक ब्याटिङ गर्दै मात्र ३३ बलमा अविजित ९३ रनको कीर्तिमानी पारी खेले। उनको पारीमा ५ चौका र ९ छक्का सामेल थिए। पाटीदारले ५० भन्दा बढी रन बनाउने कप्तानहरूमध्ये आईपीएल इतिहासकै सर्वाधिक उच्च स्ट्राइक रेट (२८१.८१) को नयाँ कीर्तिमान समेत कायम गरे। उनलाई क्रुणाल पाण्ड्याले ४३ रन र विराट कोहलीले ४३ रन बनाएर बलियो साथ दिएका थिए। गुजरातका लागि कगिसो रबाडा र जेसन होल्डरले २-२ विकेट लिए। रबाडाले यस सिजनको पावरप्लेमा १८ विकेट लिँदै कीर्तिमान बनाए पनि उनी यसै संस्करणमा सबैभन्दा बढी ३५ छक्का खाने बलर समेत बनेका छन्।
२५५ रनको विशाल लक्ष्य पछ्याएको गुजरात टाइटन्सको सुरुवात निकै खराब रह्यो। ५१ रन जोड्दा ५ विकेट गुमाइसकेको गुजरातका लागि राहुल तेवतियाले एक्लै संघर्ष गर्दै ४३ बलमा ६८ रन बनाए पनि टोलीलाई जित दिलाउन सकेनन्। गुजरात १९.३ ओभरमा १६२ रनमै अलआउट हुन पुग्यो। बेंगलुरुका लागि डफीले ३ विकेट लिए भने क्रुणाल पाण्ड्या, भुवनेश्वर कुमार र रसिख सलामले २-२ विकेट झारे। अब गुजरातले फाइनल प्रवेशको दोस्रो मौकाका लागि ‘क्वालिफायर-२’ मा प्रतिस्पर्धा गर्नेछ, जहाँ उसको भेट बुधबार न्यु चण्डीगढमा हुने सनराइजर्स हैदराबाद र राजस्थान रोयल्सबीचको ‘एलिमिनेटर’ खेलको विजेतासँग हुनेछ।
