काठमाडौँ । मलेसियामा जारी एसियाली खेलकुद महिला क्रिकेट छनोट प्रतियोगिताअन्तर्गत नेपाली महिला क्रिकेट टोलीले आज बुधबार चीनसँग प्रतिस्पर्धा गर्दै छ। मलेसियाको बायोमास ओभल मैदानमा हुने यो खेल नेपाली समयानुसार बिहान ११:४५ बजे सुरु हुने तालिका तय भएको छ।
यसअघि चीनविरुद्ध खेलिएका दुवै टि-ट्वान्टी अन्तर्राष्ट्रिय खेलमा नेपाल विजयी भएकाले नेपाली टोली आज पनि सोही इतिहासलाई दोहोर्याउँदै प्रतियोगितामा सुखद सुरुआत गर्ने रणनीतिका साथ मैदान उत्रनेछ। सन् २०१७ र २०१९ मा बैंककमा भएका ती खेलहरूमा नेपालले चीनमाथि क्रमशः १० विकेट र ५ रनको रोमाञ्चक जित दर्ता गरेको थियो। यस पटक एसियन गेम्समा छनोट हुने मुख्य लक्ष्यसहित मलेसिया पुगेको नेपाली टोली पहिलो खेलबाटै स्पष्ट अङ्क जोड्ने दाबीसहित मैदानमा उत्रनेछ।
अर्कोतर्फ, हिजो मंगलबार सम्पन्न खेलमा इन्डोनेसियालाई ३ विकेटले पराजित गर्दै विजयी सुरुआत गरिसकेको चीन पनि बलियो आत्मविश्वासका साथ नेपालविरुद्ध मैदानमा ओर्लिनेछ। चीन नेपाललाई स्तब्ध पार्दै लगातार दोस्रो जित निकाल्ने दाउमा छ। ६ वटा राष्ट्रिय टोलीहरूको सहभागिता रहेको र आगामी आइतबारसम्म चल्ने यस छनोट प्रतियोगिताको शीर्ष ३ स्थानमा रहने टोलीहरूले यसै वर्ष जापानमा आयोजना हुने २०औँ एसियाली खेलकुदमा भाग लिन पाउनेछन्। नेपालले समूह ‘बी’ अन्तर्गतको आफ्नो दोस्रो खेल भोलि बिहीबार इन्डोनेसियासँग खेल्ने तालिका रहेको छ।
