काठमाडौँ । सरकारले विदेशस्थित विभिन्न १७ वटा देशका कूटनीतिक नियोगहरूमा रिक्त रहेका राजदूत तथा स्थायी प्रतिनिधि पदका लागि खुला प्रतिस्पर्धात्मक प्रणालीमार्फत आवेदन माग गरेको छ। परराष्ट्र मन्त्रालयले बिहीबार औपचारिक कार्यविधि स्वीकृत गर्दै योग्य तथा इच्छुक नेपाली नागरिकहरूबाट आवेदन आह्वान गरेको हो। हाल नेपालका १७ वटा कूटनीतिक नियोगहरू प्रमुखविहीन (कार्यवाहकको भरमा) रहेकाले सरकारले पहिलो पटक नयाँ मापदण्डसहित यो प्रक्रिया अघि बढाएको हो।
नयाँ स्वीकृत कार्यविधि अनुसार राजदूत पद नेपाल सरकारको राजपत्राङ्कित विशिष्ट श्रेणी (सचिव सरह) को मानिनेछ र नियुक्त हुने राजदूतहरूको कार्यकाल कुल चार वर्षको हुनेछ। खुला प्रतिस्पर्धाको माध्यमबाट भारत, चीन, अमेरिका, बेलायत, अष्ट्रेलिया, इजरायल, दक्षिण कोरिया, अष्ट्रिया, बहराइन, बङ्गलादेश, मलेसिया, ओमान र साउदी अरेबियालगायतका देशहरूमा नयाँ राजदूत नियुक्त गरिने मन्त्रालयले जनाएको छ। तर, कुन उम्मेदवारलाई कुन देशमा पठाइने भन्ने विषय भने उसको योग्यता र कार्ययोजनाका आधारमा पछि तय गरिनेछ।
राजदूत पदका लागि आवेदकहरूले अन्तर्राष्ट्रिय सम्बन्ध, राजनीति शास्त्र, कानुन, अर्थशास्त्र वा सार्वजनिक प्रशासनमध्ये कुनै एक विषयमा अनिवार्य रूपमा स्नातकोत्तर (Master’s Degree) तह उत्तीर्ण गरेको हुनुपर्नेछ। यसका साथै आवेदक नेपाली नागरिक हुनुपर्ने, कम्तीमा ३५ वर्ष उमेर पुगेको हुनुपर्ने तथा कुनै पनि विदेशी मुलुकको स्थायी वा अस्थायी बसोबास सुविधा (जस्तै पीआर वा ग्रीनकार्ड) नलिएको हुनुपर्ने कडा व्यवस्था गरिएको छ। भ्रष्टाचार वा नैतिक पतन देखिने फौजदारी अपराधमा दोषी ठहर नभएको, उच्च नैतिक चरित्र भएको र अंग्रेजी भाषामा राम्रो दक्खल भएको व्यक्ति मात्र यसका लागि योग्य मानिनेछन्। सम्बन्धित देशको रैथाने भाषा जान्ने उम्मेदवारलाई छनोट प्रक्रियामा थप लाभ मिल्ने मन्त्रालयले जनाएको छ।
