काठमाडौँ । नेपाली कांग्रेसले आगामी असोज १६ देखि १९ गतेसम्म काठमाडौँमा आयोजना हुने पार्टीको १५औँ महाधिवेशनलाई भव्य ‘महाउत्सव’का रूपमा मनाउने निर्णय गरेको छ। आइतबार पार्टी केन्द्रीय कार्यालय सानेपामा बसेको केन्द्रीय कार्यसम्पादन समितिको बैठकले पार्टीको सर्वोच्च नीति निर्माण तथा नेतृत्व चयन प्रक्रियालाई उत्साहजनक र भव्य बनाउन यस्तो निर्णय गरेको हो।
बैठकका निर्णयबारे जानकारी दिँदै पार्टीका प्रवक्ता देवराज चालिसेले १५औँ महाधिवेशनलाई ऐतिहासिक बनाउन सम्पूर्ण तयारी अघि बढाइएको बताउनुभयो। बैठकले १४औँ महाधिवेशनबाट निर्वाचित केन्द्रीय कार्यसमितिका सदस्यहरूलाई सोही हैसियत प्रदान गर्ने निर्णय समेत गरेको छ। यस निर्णयसँगै पार्टीभित्रको आन्तरिक व्यवस्थापन र महाधिवेशन प्रतिनिधिहरूको अधिकार सुनिश्चित हुने विश्वास गरिएको छ।
यसैबिच, महाधिवेशनको औपचारिक उद्घाटन सत्र (खुला सत्र) र सांगठनिक नीति तथा विधानसम्बन्धी छलफल हुने बन्द सत्र दुवै काठमाडौँस्थित ऐतिहासिक खुलामञ्चमै सञ्चालन गरिने प्रवक्ता चालिसेले जानकारी दिनुभयो। महाधिवेशनलाई केवल नेतृत्व चयनको औपचारिकतामा मात्र सीमित नराखी देशभरका नेता-कार्यकर्तामा नयाँ ऊर्जा र एकताको सन्देश प्रवाह गर्ने माध्यमका रूपमा विकास गरिने कांग्रेसले जनाएको छ।
