काठमाडौँ । जल तथा मौसम विज्ञान विभाग, मौसम पूर्वानुमान महाशाखाले देशको मौसमी प्रणालीमा फेरबदल भइरहेको जनाएको छ। जेठ २१ गते बिहीबार देशको हिमाली तथा पहाडी भू-भागमा साधारणतया बादल लाग्ने र तराईका क्षेत्रमा आंशिक बदली हुने प्रक्षेपण गरिएको छ।
महाशाखाका अनुसार आज दिउँसो लुम्बिनी र सुदूरपश्चिम प्रदेश लगायत देशका अन्य हिमाली तथा पहाडी भू-भागका थोरै स्थानहरूमा मेघगर्जन र चट्याङसहित मध्यमसम्मको वर्षा तथा उच्च हिमाली क्षेत्रमा हिमपातको सम्भावना रहेको छ। पहाडी क्षेत्रमा वर्षाको सङ्केत देखिए पनि मधेश प्रदेशका साथै कोशी, बागमती र गण्डकी प्रदेशका तराई भू-भागमा भने आज पनि अत्यधिक गर्मी अर्थात् ‘तातो दिन’ (लू) हुने सम्भावना रहेकाले सचेत रहन आग्रह गरिएको छ।
आज राति कोशी र मधेश प्रदेश लगायत देशको हिमाली भू-भागमा साधारणतया बदली रहनेछ भने पहाडी भू-भागमा आंशिक बादल लाग्नेछ। तराईका बाँकी क्षेत्रमा भने मौसम मुख्यतया सफा रहने महाशाखाले जनाएको छ। रातिको समयमा कोशी र मधेश प्रदेशका साथै बागमती, गण्डकी, लुम्बिनी र कर्णाली प्रदेशको हिमाली तथा पहाडी भू-भागका एक-दुई स्थानमा हल्का वर्षा र हिमपातको सम्भावना रहेको छ।
