काठमाडौँ । हाल नेपालको मौसममा पश्चिमी न्यून चापीय रेखा, स्थानीय वायु र पूर्वीय वायुको संयुक्त प्रभाव देखिएको छ। जल तथा मौसम विज्ञान विभाग, मौसम पूर्वानुमान महाशाखाका अनुसार देशका फरक–फरक भू–भागमा मौसमको विविध रूप देखिन थालेको छ।
आज असार १ गते सोमबार देशको हिमाली भू–भाग र कोशी प्रदेशको पहाडी भू–भागमा साधारणतया बादल लाग्नेछ भने कोशी, मधेस, बागमती र गण्डकी प्रदेशका तराई क्षेत्रमा आंशिक बदली हुने सम्भावना छ। मौसममा आएको यो परिवर्तनसँगै कोशी, बागमती र गण्डकी प्रदेशका हिमाली तथा पहाडी भू–भागका थोरै स्थानहरूमा र कर्णालीको एक–दुई स्थानमा मेघगर्जन र चट्याङ्गसहित मध्यम वर्षा भइरहेको छ। कोशी प्रदेशको तराईका थोरै स्थानहरू र मधेस प्रदेशको पनि एक–दुई स्थानमा चट्याङ्गसहित पानी पर्ने मौसमविद्को भनाइ छ।
पूर्वी र पहाडी क्षेत्रमा वर्षाको सम्भावना रहँदा पश्चिम तराईमा भने गर्मीले जनजीवन प्रभावित पार्ने देखिएको छ। महाशाखाका अनुसार लुम्बिनी र सुदूरपश्चिम प्रदेशका तराई भू–भागका केही स्थानहरूमा आज अत्यधिक गर्मी बढ्ने र तातो हावा (लू) चल्न सक्ने भएकाले आवश्यक सतर्कता अपनाउन महाशाखाले विशेष आग्रह गरेको छ।
