चितवन । राष्ट्रिय स्वतन्त्र पार्टी (रास्वपा) का सभापति रवि लामिछानेले मुलुकको बागडोर र भविष्य अब आफ्नो दलको काँधमा आइपुगेको भन्दै देश पूर्ण रूपमा सुरक्षित रहेको दाबी गरेका छन्। चितवनको भरतपुरमा आइतबारदेखि प्रारम्भ भएको पार्टीको पहिलो ऐतिहासिक राष्ट्रिय महाधिवेशनको भव्य उद्घाटन सत्रलाई सम्बोधन गर्दै उनले यस्तो धारणा राखेका हुन्।
समारोहमा उपस्थित अन्य राजनीतिक दलका शीर्ष नेताहरूलाई समेत सम्बोधन गर्दै सभापति लामिछानेले बदलिएको राजनीतिक पृष्ठभूमि र परिस्थितिले रास्वपालाई मुलुककै सबैभन्दा शक्तिशाली र निर्णायक शक्तिका रूपमा उभ्याएको उल्लेख गरे। यद्यपि, शक्ति आर्जन गर्नु भनेको अन्य दलप्रति प्रतिशोध साँध्ने वा दम्भ देखाउने अनुमति पत्र नभएको भन्दै उनले राजनीतिक इमानदारिता प्रदर्शन गर्ने स्पष्ट पारे।
उनले नागरिक अधिकार र लोकतान्त्रिक मूल्य मान्यताको संरक्षणमा आफ्नो दल प्रतिबद्ध रहेको भन्दै अन्य दलका नेताहरूलाई संशय नराख्न कूटनीतिक आग्रह गरे। रास्वपाले सदैव लोकतन्त्रका स्थायी मान्यता, देशको संविधान र मानवअधिकार लगायतका महत्त्वपूर्ण पक्षहरूको जगेर्ना गर्ने प्रतिबद्धतासहित जिम्मेवार राजनीतिको जग बसाल्ने उनको भनाइ थियो। देशभरका प्रतिनिधिहरू सहभागी यस महाधिवेशनले नयाँ नेतृत्व र भावी कार्यदिशा तय गर्नेछ।
