काठमाडौँ । नेकपा एमालेका उपाध्यक्ष विष्णुप्रसाद पौडेल पक्राउ परेको घटनालाई लिएर एमालेले कडा आपत्ति जनाउँदै यसको राजनीतिक र कानुनी प्रतिवाद गर्ने घोषणा गरेको छ। सम्पत्ति शुद्धीकरण अनुसन्धान विभागको पत्राचारका आधारमा सोमबार सुर्खेतबाट प्रहरीले पौडेललाई नियन्त्रणमा लिएपछि एमालेले यसलाई ‘सस्तो लोकप्रियता र राजनीतिक स्टन्ट’ को संज्ञा दिएको हो।
एमाले महासचिव शङ्कर पोखरेलले पार्टीको औपचारिक कार्यक्रममा सहभागी हुन सुर्खेत पुगेका नेता पौडेललाई नियोजित रूपमा पक्राउ गरिएको दाबी गरेका छन्। अनुसन्धान र तथ्य सङ्कलनपछि अदालतको निर्णयका आधारमा अघि बढ्नुपर्ने न्यायिक मान्यताविपरीत ‘अदृश्य शक्तिकेन्द्र’ को निर्देशनमा गिरफ्तारी भएको उनको भनाइ छ। महासचिव पोखरेलका अनुसार विभागका महानिर्देशकले फोन गरेर काठमाडौँ फर्किएपछि सम्पर्क गर्न आग्रह गरेको केही समयमै सुर्खेत प्रहरीलाई पक्राउ गर्न निर्देशन दिइएको थियो, जसले यो घटनालाई थप शङ्कास्पद बनाएको छ।
पार्टी अध्यक्ष केपी शर्मा ओली र महासचिव पोखरेलले राज्यका निकायहरू स्वतन्त्र र निष्पक्ष हुनुपर्नेमा जोड दिँदै पूर्वाग्रह र प्रतिशोधका आधारमा कसैलाई सिध्याउने हतियार नबन्न सरकारलाई चेतावनी दिएका छन्। वास्तविक दोषी कानुनबाट उम्कन नहुने तर प्रतिशोधपूर्ण रूपमा पूर्वाग्रहको सिकार बनाउने षड्यन्त्र स्वीकार्य नहुने भन्दै एमालेले सरकारको यस कदमविरुद्ध दृढतापूर्वक उभिने स्पष्ट पारेको छ।
