काठमाडौँ । प्रमुख प्रतिपक्षी दल नेपाली कांग्रेसले प्रधानमन्त्रीले संसदमा उठेका प्रश्नहरूको जवाफ सदनलाई नदिई पार्टीको महाधिवेशनको मञ्चबाट दिएको भन्दै गम्भीर आपत्ति जनाएको छ। प्रतिनिधिसभाको आइतबारको बैठकमा बोल्दै कांग्रेस सांसद रेणुका काउचाले यसप्रति असन्तुष्टि व्यक्त गरेकी हुन्।
सांसद काउचाले प्रधानमन्त्रीको प्रत्येक अभिव्यक्ति देशको आधिकारिक राजनीतिक सन्देश हुने भएकाले आफ्नो ओहोदाको गरिमा जोगाउन र कूटनीतिक मर्यादामा सचेत रहन प्रधानमन्त्रीलाई आग्रह गरिन्। विपक्षी दलहरूले सदनमा लगातार जवाफ मागिरहे पनि प्रधानमन्त्रीले पार्टी महाधिवेशनमा गएर जवाफ दिएको भन्दै उनले ‘सदनलाई होइन पार्टीका कार्यकर्तालाई जानकारी दिनुभएको हो ?’ भनी प्रश्नसमेत गरेकी छिन्।
