काठमाडौँ । हाल देशभर मनसुनी वायुको प्रभाव कायमै रहेको छ। मौसम पूर्वानुमान अनुसार मनसुनको न्यून चापीय रेखा सरदर स्थानमा रहेकाले आज देशका विभिन्न भागमा वर्षा हुने र विशेषगरी ६ वटा प्रदेशमा भारी वर्षाको सम्भावना रहेको छ।
मङ्गलबार दिउँसो देशभरको मौसम साधारणतया बदली रहनेछ। पहाडी तथा हिमाली भू-भागका धेरैजसो स्थानमा मेघगर्जन र चट्याङ्गसहित हल्कादेखि मध्यम वर्षाको सम्भावना रहेको छ। कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका पहाडी भू-भागका एक-दुई स्थानमा भारी वर्षा हुन सक्ने पूर्वानुमान गरिएको छ। मधेस प्रदेश र अन्य तराईका केही स्थानमा समेत मध्यम वर्षा हुनेछ।
रातिको समयमा पनि देशभर मौसम बदली नै रहनेछ। कोशी, बागमती र गण्डकी प्रदेशका पहाडी तथा तराई भू-भागका एक-दुई स्थानमा राति पनि भारी वर्षाको सम्भावना रहेको छ। लगातारको वर्षाका कारण नदी तटीय क्षेत्रमा पानीको बहाव बढ्ने, तराईका होचा स्थानमा डुबान हुने र पहाडी भू-भागमा पहिरोको उच्च जोखिम रहने भएकाले यात्रा गर्दा र दैनिक कामकाजमा आवश्यक सतर्कता अपनाउन सर्वसाधारणलाई अनुरोध गरिएको छ।
