काठमाडौं : विश्व बजारमा सुनको मूल्यमा आएको भारी गिरावटसँगै नेपाली बजारमा पनि आज सुनको भाउ उच्च अंकले घटेको छ।
नेपाल सुनचाँदी व्यवसायी महासंघका अनुसार आज नेपाली बजारमा छापावाला सुनको मूल्य प्रतितोला १८ हजार ८०० रुपैयाँले घटेको हो। यो गिरावटसँगै आज सुनको मूल्य प्रतितोला ३ लाख रुपैयाँ कायम भएको छ।
यसअघि अघिल्लो कारोबार दिन शुक्रबार पनि सुनको मूल्यमा ठुलो गिरावट आएको थियो। शुक्रबार प्रतितोला २० हजार ५०० रुपैयाँले घटेर सुनको मूल्य ३ लाख १८ हजार ८०० रुपैयाँ कायम भएको थियो। पछिल्ला दुई कारोबार दिनमै सुनको मूल्य तोलामा ३९ हजार ३०० रुपैयाँले घटिसकेको छ।
सुनसँगै आज चाँदीको मूल्यमा पनि गिरावट आएको छ। महासंघले आजका लागि चाँदीको भाउ प्रतितोला ५ हजार ५०० रुपैयाँ तोकेको छ। अन्तर्राष्ट्रिय बजारमा सुनको मूल्यमा आएको अस्वभाविक गिरावटका कारण त्यसको सिधा असर नेपाली बजारमा परेको महासंघले जनाएको छ।
