काठमाडौँ । लामो समयदेखि आधा सिलिन्डर ग्यास प्रयोग गर्न बाध्य नेपाली उपभोक्ताका लागि खुसीको खबर छ। नेपाल आयल निगमले बजारमा ग्यासको आपूर्ति सहज भएसँगै बुधबारदेखि साबिककै १४.२ किलोग्राम वजनको पूरा सिलिन्डर बिक्री वितरण गर्ने निर्णय गरेको छ। यससँगै ग्यास अभाव टार्न लागू गरिएको आधा सिलिन्डरको अस्थायी व्यवस्था औपचारिक रूपमा अन्त्य भएको छ।
बजारमा ग्यासको चरम अभाव हुन नदिन र सबैको भान्सामा इन्धन पुर्याउने उद्देश्यले निगमले गत फागुन २९ गतेदेखि ७.१ किलोको आधा सिलिन्डर मात्र बजारमा पठाउन थालेको थियो। अब भने आपूर्ति शृङ्खला सामान्य अवस्थामा फर्किएपछि उपभोक्ताको सहजतालाई ध्यानमा राख्दै निगमले देशभर एकैसाथ भरिभराउ सिलिन्डर पठाउने प्रबन्ध मिलाएको हो। नयाँ व्यवस्था लागू भए पनि उपभोक्ताले पूरा सिलिन्डरका लागि यसअघिकै निर्धारित मूल्य २ हजार ६० रुपैयाँ मात्र तिर्नुपर्नेछ।
बजारमा अचानक अन्योल सिर्जना नहोस् भन्नका लागि निगमले विशेष सतर्कतासमेत अपनाएको छ। उपभोक्ताको घरमा रहेका आधा सिलिन्डर ग्यास पूर्ण रूपमा फिर्ता नहुँदासम्म बजारमा दुवै प्रकारका (आधा र पूरा) सिलिन्डर उपलब्ध हुनेछन्। यसले गर्दा आधा सिलिन्डर प्रयोग गरिरहेका ग्राहकलाई आफ्नो खाली सिलिन्डर साटेर नयाँ भरिभराउ सिलिन्डर लिन कुनै प्राविधिक तथा व्यावहारिक झन्झट हुनेछैन।
