काठमाडौँ । जल तथा मौसम पूर्वानुमान महाशाखाका अनुसार बुधबार देशभर मनसुनी वायुको प्रभावका कारण साधारणतया बदली रही देशका विभिन्न भू-भागमा वर्षा र हिमपातको सम्भावना रहेको छ। विशेषगरी पहाडी तथा तराईका केही क्षेत्रहरूमा मेघगर्जन र चट्याङ्गसहित भारी वर्षा हुन सक्ने पूर्वानुमान गरिएको छ।
आज दिउँसो देशभर साधारणतया बादल लाग्नेछ। कोशी, बागमती र गण्डकी प्रदेशका हिमाली भू-भागका केही स्थान तथा लुम्बिनी, कर्णाली र सुदूरपश्चिम प्रदेशका हिमाली क्षेत्रका थोरै स्थानमा मेघगर्जन र चट्याङ्गसहित मध्यम वर्षा र हिमपातको सम्भावना छ। यसैगरी देशका पहाडी भू-भागका केही स्थानहरूका साथै मधेश प्रदेशसहित कोशी, बागमती, गण्डकी, लुम्बिनी र सुदूरपश्चिम प्रदेशका तराईका क्षेत्रमा मध्यम वर्षाको प्रक्षेपण गरिएको छ। दिउँसो कोशी, बागमती, गण्डकी र लुम्बिनी प्रदेशको पहाडी भू-भागका एक-दुई स्थानमा भारी वर्षाको सम्भावना रहेको छ।
रातिको समयमा पनि देशभर साधारणतया बदलीकै अवस्था रहनेछ। कोशी, बागमती र गण्डकी प्रदेशका हिमाली भेगका थोरै स्थान तथा लुम्बिनी, कर्णाली र सुदूरपश्चिम प्रदेशका हिमाली क्षेत्रका एक-दुई स्थानमा मध्यम वर्षा र हिमपात हुन सक्नेछ। त्यस्तै देशका पहाडी तथा तराई भू-भागका केही स्थानहरूमा चट्याङ्गसहित मध्यम वर्षाको सम्भावना छ। राति मधेश प्रदेशका साथै कोशी र लुम्बिनी प्रदेशको तराई भू-भागका एक-दुई स्थानमा भारी वर्षाको सम्भावना रहेकाले महाशाखाले नदी तटीय क्षेत्र तथा भिरालो जमिन आसपासका बासिन्दालाई सतर्क रहन अपिल गरेको छ।
